BAKOLOSE 4

₁Lena Marena! Bahlanka ba lena ba direleng tše di lokilego le tše di swanetšego; tsebang gobane le lena le na le mong wa lena kua magodimong.

₂Tiišang thapelo. Le phakgame mo go yona le leboga. ₃Le rena le re rapelele gore Modimo a re bulele mojako wa Lentšu, gore go bolelwe sephiri sa Kriste, se nna ke tlemilwego ka baka la sona, ₄gore ke se bonagatše ka mo go ntshwanetšego go bolela.

₅Bantle le phedišane nabo ka bohlale, ka go thakanela sebaka. ₆Polelo ya lena a e be ya botho ka mehla, e be e nokilwego letswai; le tsebe go fetola mang le mang ka mo go le swanetšego.

₇Tša bophelo bja ka le tlo di tsebišwa ka moka ke Tigiko ngwanešomoratwa, mohlankammotegi, molatakanna Moreneng. ₈Ke yena yo ke mo rometšego go lena, taba e le gore le tsebe tša maphelo a rena, a homotše dipelo tša lena. ₉O na le Onesimo ngwanešommotegi le moratiwa, e lego wa geno. Ba tlo le tsebiša tša mono ka moka.

₁₀Aristareko motlengwakanna, le Mareka moswa wa Baranaba, yo le kwelego malaeledi a re: ge a ka tla go lena le mo amogele, ba le dumedišitse, ₁₁Le Jesu e a bitšwago ka la Justo. Ke bona ba e lego ba lebollo. Ke bona fela ba e lego badirašani baka mmušong wa Modimo; ke rolwa pelo ke bona.

₁₂Le dumedišwa ke Epafora wa geno, ke mohlanka wa Kriste e a le lwelago ka dithapelelo ka mehla, gore le eme le le ba boloka tlalo, le kgodilwemoka ke se e lego thato ya Modimo. ₁₃Gobane nna ke mo hlatsela gore o itapiša gagolo ka baka la lena le ba Loaditsea le ba Hierapoli. ₁₄Le dumedišwa ke Luka ngaka, moratiwa, le Dema.

₁₅Dumedišang bana bešo ba Laoditsea, le Nimfa le phuthego ya ngwakong wa gagwe. ₁₆E re ge lengwalo le le badilwe moo ga geno, le dire gore le balwe le phuthegong ya Laoditsea, mme lena le bale la Laoditsea. ₁₇Botšang Aragipo le re a hlokomele modiro wo a o amogetšego Moreneng; gore a o phethe.

₁₈Tumedišo ye ke ya seatla sa ka, sa nna Paulo. Gopolang ditlemo tša ka.

Kgaugelo a e be le lena. Amene.