Daniele le bagwera ba gagwe
1Ka ngwaga wa boraro wa pušo ya Joyakima kgoši ya Juda, Nebukadinetsara kgoši ya Babele o tlile motseng wa Jerusalema a o rakelela. 2Mong a bohle a gafela Joyakima kgoši ya Juda diatleng tša gagwe. Le thoto tše dingwe tša Ntlo ya Modimo, Nebukadinetsara o di išitše nageng ya Sineara ngwakong wa Modimo wa gagwe; a di boloka ngwakong wa matlotlo a modimo wa gagwe.
3Kgoši a laela Asipenase mogolo wa dikala tša gagwe, a re a hlaole ba bangwe ba Baisiraele ba moloko wa kgoši le bakgomana; 4E be masogana a se nago bosodi a dinatla, e be ba bohlale ka moka le tsebo ka moka, ba ba nago le thlaologanyo le temogo, ba ba loketšego go hlankela kgoši ngwakong wa mošate; bona bao a ba rute mangwalo le mmolelo wa Bakaladea. 5Gomme kgoši ya laela ya re ka tšatši le lengwe le le lengwe ba abelwe dijo tsa kgoši, le beine ye e nwewago ke kgoši; ba fepše ka mokgwa o bjalo nywaga e meraro, e be gona ba tlogo kgona go hlankela kgoši. 6Mo go bona bao go be go na le ba moloko wa Juda; e be e le Daniele, le Hananya, le Misaele, le Asaria. 7Mogolo wa dikala yena a ba reela maina a mangwe, a re Daniele ke Belesatsara, Hananya a re ke Sadirake, Misaele ke Mesake, Asaria ke Abedinego.
8Daniele mo pelong ya gagwe a tiiša a re a ka se ke a ja seila ka dijo tša kgoši, le ka beine ye e nwewago ke kgoši; a kgopela mogolo wa dikala gore a dumelelwe go di ila. 9Modimo a mo hwetšiša botho le boleta go mogolo wa dikala.
10Mogolo wa dikala a bolela le Daniele a re: Se ke se boifago ke ge tše le di jago di laetšwe ke yena kgoši; gobane ge a ka bona le otile le sa etše masogana a mangwe a thaka tša lena, le ka nthweša molato go kgoši.
11Daniele a bolela le molaki yo mogolo wa dikala a mo gafetšego boDaniele le Hananya le Misaele le Asaria, 12A re: A ko leke matšatši a lesome o lesa rena bahlanka ba gago re eja merogo, re enwa meetse; 13Go tsebo lebelešwa difahlogo tša rena o le gona, le tša masogana ao a jago dijo tša kgoši; ke mo rena bahlanka ba gago o tlogo re dira ka mo o bonago.
14Molaki a dumela lentšu leo, a leka ka ona matšatši ao a lesome. 15Ge matšatši ao a fetile, gwa bonwa difahlego tša bona e le tše dibotse, ba tiile mebele, ba fetiša masogana ka moka a jago dijo tša kgoši. 16Molaki a lesa go ba nea dijo tše ba bego ba di beetšwe, a lesa le beine ye ba bego ba swanetše go e nwa; a ba fa merogo.
17Modimo yena a nea masogana a mane ao tsebo le tlhaologanyo mo dithutong ka moka tša bohlale; Daniele yena ya ba wa go hlaologanya dipono le diloro.
18Mohla go fetilego lebaka le le bego le beilwe ke kgoši mogolo wa dikala a ba tliša pele ga Nebukadinetsara. 19Kgoši ya bolela le bona; gomme mo go bona ka moka gwa se ke gwa hwetšwa e a swanago le Daniele le Hananya le Misaele le Asaria, mme gwa bewa bona go hlankela kgoši. 20Ditabeng ka moka tša bohlale le tša tlhaologanyo, tše kgoši a bego a ba botšiša tšona, gwa hwetšwa ba phala tšohle dingaka le dinoge tša mmušo wa gagwe ka moka. 21Ge e le Daniele yena o phedile a ba a bona ngwaga wa pele wa kgoši Korese.
