Go tla ga Morongwa wa go tliša kutollo
1Ka ngwaga wa boraro wa Korese kgoši ya Peresia, Daniele e a reetšwego la Belesatsara, o utolletšwe taba; mme taba yeo ke therešo, ke ya ntwa e kgolo. Daniele o e etše hloko, a hlaologanya pono yeo.
2Mehleng yeo nna Daniele ke feditše beke tše tharo ke nyamile. 3Dibeke tše tharo tša fela ke sa je dijo tše monate, molomong wa ka go sa tsene nama le ge e le beine, ke lesa le go tlola.
4Ka tšatši la masome a mabedi a metšo e mene la kgwedi ya pele ke be ke eme lebotong la noka e kgolo ya Hidekele. 5Ka emiša mahlo a ka ka lebelela, ka bona monna e a aperego lešela la leokodi, a tlemile matheka ka gauta ya Ufase. 6Mmele wa gagwe o be o phadima boka tshipi e khubedu, sefahlogo sa gagwe se etša legadima, mahlo a etša diša tša mollo, matsogo a gagwe le maoto a gagwe a etša mphiri ge o gohlilwe, lentšu la gagwe le le bjalo ka modumo wa mabotho.
7Nna Daniele pono ye ke e bone ke nnoši; banna ba ba bego ba na le nna ga ba ka ba e bona, ba fo welwa ke tšhogo e kgolo, ba tšhaba ba utama. 8Nna ka šala ke nnoši, ka bona pono e kgolo yeo; ka tlogwa ke maatla, sefahlogo sa ka sa galoga wa go befa, ka nolega moko. 9Ka kwa modumo wa mantšu a gagwe; ge ke ekwa a hlaboša lentšu, ka wela fase ke idibetše. 10Ka kwa ke swarwa ke seatla, sa nthuša ka khunama ka matolo ka ikokotlela ka seatla.
11A bolela le nna a re: Daniele wena monna wa morategi! Theetša se ke se bolelago le wena. Ema moo, gobane bjale ke rometšwe go wena. -- Ge a realo ka ema ke thothomela.
12Bjale a re: Daniele, se boife! Gobane tše o di boletšego di kwelwe go tloga mola o sa thoma go ya le mogopolo wa go re o hlaologanye, mme o ikokobetša pele ga Modimo. Bjale ke tlile ka baka la ona mantšu a gago. 13Fela, molaodi wa mmušo wa Peresia o be a nkeme tseleng matšatši a masome a mabedi a motšo o tee; gwa ba gwa tla Mikaele, e mongwe wa balaodi ba bagolo, a ntwela, nna ke bego ke šetše ke nnoši ke elwa le magoši a Peresia. 14Bjale ke tlile go go tsebiša tše di tlogo tlela setšhaba sa geno mafelelong a matšatši; gobane pono ya mehla yeo e sa le gona.
15Ya re ge a bolela le nna a realo nna ka inama ka hloka polelo. 16Ka bona e mongwe e kego ke morwa wa motho, a nkgwatha melomo, ka napa ka ahlama ka bolela le yeo a bego a eme a lebane le nna, ka re: Mong aka! Ke wetšwe ke tšhogo ge ke bona pono ye; ga ke sa na le maatla. 17Gobane nna molata wa gago, nka kgona bjang go bolela le wena Mong a aka o mokaakaa? Nna bjale ke kwa ke se ne maatla; ke kwa ke šitwa le go buša moya.
18Ke mo gape e mongwe yo e kego ke motho a nago a nkgwatha, a mpha maatla. 19A re: Se boife, wena monna morategi! Uša pelo! Tia maatla! Tia maatla! --
A sa realo, ka fiwa maatla, ka re: Mong a ka! Bolela, ka gobane o mphile maatla.
20Yena a re: Tše ke di tletšego fa go wena, a o a di tseba? Nna bjale ke boela go lwa le molaodi wa Peresia; e tlo re ge ke tšwele, ke mo go tlogo tla molaodi wa Gerika. 21Fela, lesa ke go botše tše di ngwadilwego mangwalong a therešo. Ga go e a emago le nna ge ke e lwa le bao, ge e se Mikaele molaodi wa lena.
