DANIELE 5

₁Kgoši Belesatsara o kile a direla matona a gagwe monyanya o mogolo; e be e le ba sekete; a nwa beine a na le bona bao ba sekete. ₂Ya re ge a nwele, a laela a re go tlišwe dibjana tšela tša gauta le tša silifera tše Nebukadinetsara tatagwe a di tšerego Ntlongkgethwa ya Jerusalema, gore kgoši le matona a gagwe, le basadi ba gagwe, le basadi ba gagwe ba direthe ba nwe ka tšona. ₃Gwa tlišwa tšona dibjana tšeo tša gauta tše di tšerwego Ntlongkgethwa ya Modimo kua Jerusalema; kgoši le matona a yona, le basadi ba yona, le basadi ba yona ba direthe, ba nwa ka tšona; ₄Ba nwa beine ba fela ba reta medimo ya bona ya gauta le ya silifera le ya tshipi le ya dikwata le ya maswika.

₅Ba sa dira tšeo gwa napa gwa tšwelela menwana e kego ke ya seatla sa motho, ya ngwala lebotong la ngwako wa bogoši mo le lebanego le dipone. Kgoši ya se bona, seatla seo ge se ngwala. ₆Kgoši ya galoga sefahlgo, e tšhošwa ke kgopolo tša yona, marapo a yona a bunakana, matolo a tiana, ₇Ya hlaboša lentšu ya gowa ya re go tlišwe ba mekome le didupe, le ba bohlale, le batsebi ba dinaledi; kgoši ya botša bona ba bohlale bao ya re: Motho, le ge e le mang le mang, e a kago bala lengwalo leo a ntlhathollela se le se bolelago, o tlo apešwa kobo ya purapura le moruka wa gauta; e tlo ba wa boraro mo mmušong wa ka. ₈Ba bohlale ba mošate ka moka ba tsena, ba šitwa go bala lengwalo leo le go botša kgoši tlhathollo ya lona. ₉Kgoši Belesatsara ya ba gona a golelwago ke go tšhoga, sefahlgo sa gagwe se fetogile, le matona a gagwe a gakanegile.

₁₀Ke ge go tsena mmagokgoši a kwele mantšu a kgoši le matona a gagwe, a tla moo ngwakong wa monyanya, a bolela le kgoši a re: Kgoši a a phele go ya go ile! Dikgopolo tša gago a di se ke tša go gakantšha; le sefahlogo sa gago a se se ke sa galoga. ₁₁Mmušong wa gago go na le monna yo moya wa medimo e mekgethwa o lego mo go yena, yo mehleng ya tatago go hweditšwego mo go yena go na le seetša sa tlhaologanyo, le bohlale bjo bo swanago le bohlale bja medimo. Kgoši Nebukadinetsara tatago o mo godišitše a mmea mogolo wa ba bohlale, le didupe, le bamangwalo, le batsebi ba dinaledi, ₁₂Ka gobane go hweditšwe mo go yena go na le moya o phagamilego, le tsebo, le bohlale, le go hlatholla diloro le dinyepo, le go hunolla mahuto a diphiri; ke ra Daniele yo kgoši a mo reetšego la Belesatsara. A go bitšwe yena Daniele, a go hlathollele.

₁₃Daniele a tlišwa kgošing. Kgoši ya bolela ya re: Ke wena Daniele. O e mongwe wa Bajuda ba ba thopilwego, bao kgoši tate a ba ntšhitšego kua Juda a ba tliša mono. ₁₄Ke kwele ba go bolela ba re moya wa medimo o go wena; le gona go hwetšwa seetša se le go wena, le tlhaologanyo, le bohlale bjo bogolo. ₁₅Seba ba bohlale, le batsebi ba dinaledi, ba tlišitšwe fa gore ba bale lengwalo le, ba ntlhathollele se le se bolelago; fela, ba šitilwe go ntlhathollela dilo tšeo. ₁₆Wena ke kwa ge ba re o tseba go ntšha ditlhathollo, le go hunolla mahuto a diphiri. Bjale ge o ka kgona go bala lengwalo leo, wa mpotša tlhathollo ya lona, o tlo apešwa mašela a purapura, le moruka wa gauta molaleng wa gago; o tlo ba wa boraro mmušong wa ka.

₁₇Daniele a fetola a lebane le kgoši, a re: Ithswarele dineo tšeo tša gago; dimpho tša gago di fe yo mongwe. Lengwalo lona ke tlo go balela, kgoši, ka go ntšhetša tlhathollo ya lona.

₁₈Kgoši Modimo yo godimodimo o be a neetše tatago Nebukadinetsara mmušo le bogolo le kgodišo le letago. ₁₉Baditšhaba ka moka le ba merafo le ba malemeleme, ba be ba thothomela ka baka la maatla a a bego a filwe ona. O be a bolaya yo a bego a rata go mmolaya, a phediša yo a bego a rata go mo phediša, a kokobetša yo a ratago go mo kokobetša. ₂₀Fela, ya re mola pelo ya gagwe e ipotile, moya wa gagwe o thatafetše o ikgantšha, a tlošwa mo sedulong sa gagwe sa bogoši, amogwa borena. ₂₁A ba a lelekwa bathong, a tsenwa ke tše e kego ke tša phoofolo, a dula le dipitsi tša lešoka, a fula bjang boka kgomo, mmele wa gagwe wa koloba ka phoka ya legodimo; a ba a lemoga gobane mebušo ya batho e bušwa ke Modimo yo godimodimo; o bea yo a ratago go mmea.

₂₂Bjale wena Belesatsara morwa wa gagwe, ga wa ka wa boetša pelo ya gago, le ge ditaba tšeo o di tsebile tšohle. ₂₃Wa ikgodiša wa rumola Morena wa legodimo ka go tliša dibjana tša Ntlo ya gagwe fa pele ga gago. Mme wena, le matona a gago, le basadi ba gago, le basadi ba gago ba direthe, le nwele sedila ka tšona le reta medimo ya silifera le ya gauta le ya mphiri le ya tshipi le ya kwata le ya maswika, ye e sa bonego, ye e sa kwego, ye e sa tsebego selo. O nyaditše Modimo yo bophelo bja gago bo lego seatleng sa gagwe, yo ditsela tša gago ka moka di bušwago ke yena. ₂₄Molato ke wona woo ge Modimo a romile seatla seo, sa ngwala lengwalo leo.

₂₅Tše di ngwadilwego moo di re: MENE MENE TEKEL UPHARSIN. ₂₆Tlhathollo ya tšona še: MENE ke go re: Modimo o badile matšatši a mmušo wa gago a a kgaotša. ₂₇TEKEL ke go re: O etšwe boima, wa hwetšwa o le yo bohwefe. ₂₈UPHARSIN ke go re: Mmušo wa gago o fatotšwe wa abelwa Bameda le Baperesia.

₂₉Belesatsara a laela a re Daniele a apešwe mašela a purapura le moruka wa gauta molaleng; gwa goelelwa gore ke yena wa boraro mmušong. ₃₀Yena Belesatsara kgoši ya Bakaladea o bolailwe bjona bošego bjoo.