Dipabalelo tša Balefi. Go ilwe boloi le bonoge. Moporofeta e tlogo tla
1Baperisita le Balefi, le leloko ka moka la Balefi, ba ka se ke ba ba le naga e lego karolo ya bona mo go Isiraele; bona ba tlo phela ka tša mello ya Morena, le ka tše di arolelwago Yena. 2Naga e lego ya bona ba ka se ke ba ba nayo, ka mo a ba boditšego ka gona.
3Se se swanetšego baperisita go tše di tšwago setšhabeng mo go ba ba tlišago didimo, e ka ba sa powana goba sa nku, ke letsogo, le mohlagare, le mala. 4Moperisita o mo nee le dithakangwaga tša mabele a gago, le mananose a morara wa gago, le dithakangwaga tša boya bja dinku tša gago. 5Ka gobane Morena Modimo wa gago o mo hlaotše mo melokong ya geno ka moka, gore a eme a hlankele leina la Morena, yena le barwa ba gagwe ka mehla le mehla.
6Ge Molefi a ka tla a etšwa motseng o mongwe wa geno wa la Isiraele ka moka, mo a agilego ntshe, mme ka go ithatela ga pelo ya gagwe a tla felo moo Morena a tlogo go kgetha, 7a a hlankele leina la Morena wa gagwe bjalo ka bana babo bohle ba Balefi, ba ba emego moo pele ga Morena. 8Kabelo, a je ye e lekanego le ya ba bangwe, ka ntle ga thoto e kago tšwa go tatagwe.
9Ge o fihla mo nageng ye Morena Modimo wa gago a tlogo go fa yona, o se ke wa ithuta go dira makgapha a ditšhaba tša gona. 10Go wena go se ke gwa hwetšwa e a išago morwa wa gagwe goba morwedi wa gagwe mollong, le e a dirago tša bonoge le tša maphalo, le e a upago ka meupo le boloi. 11Go se ke gwa hwetšwa wa malopo, le e a botšišago badimo, le ge e le sedupe, le a nyakago selo bahung. 12Ka gobane ba ba dirago tše bjalo, Morena o bona e le makgapha; gomme ge Morena Modimo wa lena a ba raka ge le fihla, ke ka baka la bohlola bjoo. 13Morena Modimo wa gago a a go bone o se na bosodi.
14Gobane ditšhaba tše o tlogo di raka di theetša tša maphalo le tša dinoge; ge e le wena Morena Modimo wa gago ga a go dumelele go dira tše bjalo. 15Morena Modimo wa gago o tlogo tsošetša Moporofeta e a swanago le nna, e a tšwago mo gare ga lena le go bana beno; Yena eo le mo theetšeng.
16Bjalo ka mola o kgopela Morena Modimo wa gago kua thabeng ya Horebe mohla wola wa phuthego, wa re: A nke ke se ke ka hlwa ke ekwa lentšu la Morena Modimo wa ka, mme ke se ke ka hlwa ke bona mollo o mogolo wo, gore ke se hwe, 17Morena a botša nna a re: Ba boletše gabotse. 18Ke tlo ba tsošetša Moporofeta e a tšwago mo go bana babo, e a swanago le wena, a ka bea mantšu a ka molomong wa gagwe, gore a ba botše tše ke tlogo mo laela tšona. 19Gomme motho e a sa kwego mantšu a ka ao a tlo a bolela leineng la ka, yena nna ke tlo mo sekiša. 20Moporofeta e a kago ikgodiša, a bolela leineng la ka mola a se na se ke mo laetšego sona, goba a bolela leineng la modimo o šele, e mobjalo a bolawe.
21Ge mo pelong ya gago o ka re: Lentšu le le sa kago la bolelwa ke Morena re ka le tseba ka eng? 22Gona o tsebe gore, lentšu le moporofeta a le bolelago mme le se tšwelele la direga, ke lentšu le Morena a sa kago a le bolela; moporofeta eo o boletše ka go ikgodiša; o se ke wa mmoifa.
