Melao ya tlhabanong. Ba go šala gae. Go thopša ga metse
1Ge o tšwela manaba a gago dira, wa bona dipitsi, le dikoloi, le madira a a go fetago ka boati, o se ke wa boifa, gobane Morena Modimo wa gago o na le wena, yena e a go ntšhitšego nageng ya Egipita. 2Ge le šetše le lebane le tlhabano, moperisita a batamele, a bolele le setšhaba, 3a re: Baisiraele, theetšang! Lehono le yo hlabana le manaba a lena; le se ke la nolega moko; le se ke la boifa: le se ke la roromela; le se ke la ba tšhoga. 4Ka gobane Morena Modimo wa lena o tšwile le lena gore a le hlabanele ge le lwa le manaba a lena, gore a le namolele.
5Gomme balaodi ba bolele le setšhaba ba re: Ke mang e a agilego ngwako o mofsa mme a sešo a o kgakola? Yena eo a a boele gae, gore e se re ge a ka bolawa tlhabanong, ngwako wa gagwe wa tlo kgakolwa ke e mongwe. 6Gape ke mang e a lemilego serapa sa merara, mme a sešo a holwa ke sona? Yena eo a a sepele a boele gae, gore e se re ge a ka bolawa tlhabanong, serapa sa gagwe se tlo hola e mongwe. 7Goba ke mang e a beeleditšego mosadi mme a sešo a mmeka? Yena eo a a boele gae, gore e se re ge a ka bolawa tlhabanong, mosadi wa gagwe a tšewa ke e mongwe.
8Balaodi ba iše pele ba bolele le setšhaba ba re: Ke mang e a boifago, wa pelo e tshesenyane? Yena eo a a sepele a boele gae gore go sa tlo tlepesela le dipelo tša bana babo. 9Ge balaodi ba feditše go bolela le setšhaba, gona ba beele setšhaba matona a dikgao, e be bona diketapele.
10Ge le ka fihla motseng go o hula, le thome go bolela le wona a khutšo. 11Ge ba ka fetola ka a khutšo mme ba le bulela, gona setšhaba ka moka sa gona e tlo ba sa lena, se le ntšhetše diloba, e be balata ba lena. 12Ge ba sa lobe, gomme ba hlabana le lena, gona le o rakelele. 13Ge Morena Modimo wa lena a ka o gafela diatleng tša lena, gona le bolaye ba batona ka moka ka bogale bja lerumo. 14Ge e le basadi, le dikgomo, le tšohle tše di lego motseng woo, dithebola tša wona ka moka, le ithopele tšona, le je dithebola tša manaba a lena tše Morena Modimo wa lena a le fago tšona. 15Ke tšona tše le swanetšego go dira motse o lego kua kgole le lena, e sego metse ya ditšhaba tša mono kgauswi.
16Ge e le metseng ya ditšhaba tšeno, ye Morena Modimo wa lena a tlogo le fa ya ba ya lena, le se ke la šadiša motho e a bušago moya. 17Le e dire digafiwamoka; ke ya Bahethe, le Baamoro, le Bakanana, le Bapheresi, le Bahefi, le Bajebusi, ka mo Morena Modimo wa lena a le laetšego ka gona. 18Le dire ka mokgwa woo gore ba sa tlo le ruta go dira makgapha ka moka a ba direlago medimo ya bona ka ona, mme ya tlo ba go rumola Morena Modimo wa lena.
19E re ge go ka fela matšatši a mantši le rakeletše motse gore le o thope, le se ke la senya dihlare tša gona la di tsenya selepe, ka gobane le tlo phela ka tšona ge le sa di senye. Dihlare tša naga ga se batho ba le ba rakelago gore ba le šuthele sebaka. 20Dihlare tše o kago di senya ke tše o tsebago gore ga di lewe; tšona o ka di rema wa aga tša go rakelela motse woo ka tšona, wa lwa nawo wa ba wa o fenya.
