Sereto sa mahlogonolo a Isiraele
1Tšhegofatšo še ye Moše monna wa Modimo a šegofaditšego Baisiraele ka yona, a šetše a lebane le go hwa.
2O boletše a re:
Morena o tlile a etšwa Sinai,
a ba hlabela a etšwa Seire,
a gadima a le thabeng ya Parane,
a tla a etšwa go bakgethwa ba diketekete,
a ba swaretše kgabo ya mollo ka le letona.
3Mo-rata-batho-ruri;
bakgethwa bagwe bohle ba mo atleng sa gagwe;
ba dula fase dinaong tša gagwe;
ba fiwa ditshola tša mantšu a gago.
4Moshe o re laetše molao,
lona lehumo la phuthego ya Jakobo.
5YENA a ba kgoši ya ba Jeshuruni,
go bokane balaodi ba setšhaba,
ba na le meloko ya Isiraele.
6Rubeni a a phele, a se hwe,
batho ba gagwe ba ate.
7A rera Juda a re:
Morena, kwaa mokgoši wa Juda;
mo fihliše go ba gabo;
diatla tša gagwe a di ba tlatše;
O mo namolele manabeng.
8A rera Lefi a re:
Toko le seetša di na le banna ba Mmotegi wa lena,
Yo le kilego la mo leka kua Masa,
Yo le mo emetšego kua meetseng a Meriba;
9di na bao ba go rera botatabo le bommabo ba re: Se ba tsebe!
Ba go se tsebe bana babo le bana ba bona;
ka ge ba hlokometše tše o di boletšego,
ba hlapetša kgwerano ya gago.
10Ba ruta Jakobo tokelo tša gago;
ba ruta Isiraele melao ya gago.
Ba go tlišetša diorelo, tša go natefela.
Didimodimo ba di bea aletareng ya gago.
11Morena, atla maatla a bona,
o kgahlwe ke mediro ya atla tša bona;
o thokge dikgwele tša bao ba ba tsogelago;
manaba a bona a se sa tsoga.
12A rera Benyamini a re:
Moratwa wa Morena o tlo dula nae e le gae;
o tlo mo šireletša ka mehla;
13A rera Josefa a re:
Naga ya gago e atliwe ke Morena, ka tše botse tša godimo, phoka,
le ka madiba a mo fase,
14le ka tše botse tša dikenyo tša letšatši,
le ka tše botse tša go hloga ka dikgwedi,
15le ka tše bosebose tša dithaba tša bogologolo,
le ka tše botse tša meboto ya mehleng,
16le ka tše botse tša lefase ka botlalo,
ka go ratwa ke YOLA Modulasethokgwa-sa-meetlwa (Eks. 3:2)
a di tlele hlogo ya Josefa,
phogong ya yena mokgethwa go bana ba bobona.
17Thwadi ya poo tša gabo, senatla,
naka tša gagwe ke naka tša nare,
ka tšona o hlaba ditšhaba, a di hlakanya,
a goma ka magomo a lefase.
Ke bona, diketekete tša Efuraimi;
ke bona, madira a Manase.
18A rera Sebulone a re:
Ithabele, Sebulone, matšibogong a gago,
le Isašara, o le mešašeng ya gago,
19ba rapa mabotho, ba namela thaba, ba iša didimo tša toko;
ba ipshina ka menono ya mawatle,
ka mahumo-mafihlwa a lešabašaba.
20A rera Gada a re:
A go retwe Moagiša-Gada-mabaleng.
O patlame bokatau namagadi;
o phura letsogo le yona phogo.
21O ikgethetše naga ya mathomo,
mo a beetšwego mphapa wa sefoka.
O tšwile, balaodi ba setšhaba,
a phetha tša molao wa Morena,
kahlolo tša gagwe, a na le Isiraele.
22A rera Dani a re:
Dani ke tau ya lesogana;
o šwahla a etšwa Basani.
23A rera Nafutali a re:
Nafutali, mokhora-tše-botse,
motlala katlo tša Morena,
la gagwe a e be la bodikela le la borwa.
24A rera Asere a re:
Asere, morwa-moatliwa,
o tlo kgahla banababo,
o tlobunya nao makhura.
25Mapheko a gagwe ke tšhipi le mphiri.
Matšatši a gago ka moka a e be a leago.
26Ješuruni, Modimo wa gago o hloka moka Yena.
Mo-tla-ka-magodimo, a go namolela,
Motla-kaletago la marung!
27Modimo, Ramabaka-a-bogolo-golo, ke yena setšhabelo,
ge o ageletšwe ke mabogo a Waneng-le-neng;
o raka naba le o lebanago nalo;
o re le fedišwe.
28Isiraele o tlo aga a iketla;
mothopo wa Jakobo o le nnoši,
mo go lego naga ya mabele le ya mananose,
a ne leratadima letloromaphoka.
29O wa lehlogonolo, wena Isiraele!
Mokawena gao!
Setšhaba se-namolwa-ke-Morena.
Yena kotse mophemedi wago,
yena tšhoša ya go go lwela borena.
Manaba a gago a tlo tla a phuphutha;
Kua thabeng tsa ona go tlo gata wena.
