DOITERONOMIO 8

₁Ditaelo ka moka tše ke le laelago lehono le di hlokomele, le dire ka tšona gore le phele le ate, le tle le tšee naga ye Morena a e enetšego botataweno. ₂O se ke wa lebala ditsela ka moka tše Morena Modimo wa gago a go sepedišitšego tšona lešokeng nywaga e masome a mane, gore a go kokobetše, a go leke, go tsebje se se lego pelong ya gago, go tsebje goba o tlo hlokomela ditaelo tša gagwe, goba ge o tlo gana. ₃A go kokobetša, a go kwiša tlala, a go leša mana ye o bego o sa e tsebe, ye le botataweno ba bego ba sa e tsebe, gore a go lemoše gore motho ga a phele ka bogobe fela; ka gobane motho o phela ka ohle matšwamolomong wa Morena. ₄Diaparo tša gago ga tša ka tša go onalela; le maoto a gago ga a ka a ruruga, gwa ba gwa fela nywaga eo e masome a mane. ₅A nke o lemoge ka pelong ya gago gobane Morena o be a go laya bjalo ka motho ge a laya ngwana wa gagwe. ₆O hlokomele ditaelo tša Morena Modimo wa gago, gore o sepele ka ditsela tša gagwe, mme o mmoife. ₇Ka gobane Morena Modimo wa gago o go iša nageng e botse, ya dinoka le ya meetse, ya methopo le ya didiba, tše di tšwago meeding le dithabeng. ₈Ke naga ya mabele le leotša, ya merara le mego, ya marapa le mehlware, le ya dinose. ₉Ga se naga ye o tlogo ja bogobe sebotlana go yona; o ka se ke wa hloka selo go yona; ke naga ya matlapa a tshipi; dithabeng tša yona o tlo epa mefiri. ₁₀Ge o ja o khora, o leboge Morena Modimo wa gago ge a go neile naga e botse yeo.

₁₁O itote gore o se lebale Morena Modimo wa gago, wa lesa go hlokomela ditaelo tša gagwe, le melao ya gagwe, ye nna ke go laodišetšago lehono. ₁₂E se re ge o ja o hora, o aga nywako e mebotse wa dula go yona, ₁₃ge dikgomo tša gago le dihuswane tša gago di ata, ge o huma disilifera le digauta, ge go kokotlela tše e lego tša gago, ₁₄ya ba gona pelo ya gago e ikgogomošago, wa lebala Morena Modimo wa gago e a go ntšhitšego nageng ya Egipita ngwakong wa bohlanka, ₁₅e a go sepedišitšego lešokeng le legolo le le šiišago, mo go lego dinoga le diphepheng, mo go omilego go sego meetse, mme a go phulela meetse leswikeng le lethata. ₁₆Gona kua lešokeng a go solela mana ye botataweno ba bego ba sa e tsebe, gore a go kokobetše, a go leke, a kgone go go direla tše botse mehleng e tlago. ₁₇O itote gore pelong ya gago o se ke wa re: Ke maatla a ka a a ntiretšego lehumo le, ke go kgona ga diatla tša ka. ₁₈O gopole Morena Modimo wa gago, gobane ke yena e a go filego maatla a go itirela lehumo, gore go tie kgwerano ye a e enetšego botataweno. Ke tšona tše tša mehla yeno. ₁₉Fela, ge o ka ikgakiša Morena Modimo wa gago, wa latela medimo e šele wa e direla, wa e khunamela, gona ke go botša ka tiiša e sa le lehono ka re: O tlo senyegela ruri. ₂₀O tlo etša ba ditšhaba bao Morena a yogo ba senya ge le fihla; le lena le tlo senyega ka mokgwa woo, ge le sa kwe se Morena Modimo wa lena a se bolelago.