MMOLEDI 11

₁Bogobe bja gago bo lahlele bodibeng; o tlo buša wa bo hwetša go fetile mehla e mentši. ₂Hlallela ba šupa le ba seswai; ka gobane ga o tsebe kotsi e tlogo wela naga.

₃Maru ge a tla le pula, a nošetša naga. Sehlare ge se rengwa, se ka wela thoko ya borwa goba thoko ya leboa; se šala bowelong bja sona. ₄Mokwaphefo ga a bjale; kgadiamaru ga a bune. ₅Boka tsela ya phefo o sa e hlathe, o sa hlathe le popego ya mašapo ka tswaleng ya moima, le mediro e dirwago ke Modimo a dirago tše go fela ga o e tsebe. ₆Bjala peu ya gago e sa le bosasa, le ka mantšiboa atla sago se se khutše; ga o tsebe ye e tlogo mela; goba go tlo mela yeno goba yela, goba ka dipedi.

₇Seedi se monate; go bona letšatši go tsefela mahlo. ₈Ge motho a phela nywaga e mentši, a a e thabele yohle, a gopole le matšatši a leswiswi, gobane a atile; mme tšohle tše di tlago ke lefela.

₉Wena lesogana! Ithabele o sa le bofseng bja gago, o tsefelwa ke matšatši a bofseng bja gago. Swara ka tsela ye o e ratago, ye mahlo a gago a e thabelago; fela, o tsebe gobane Modimo o tlo go sekiša tšeo tšohle.

₁₀Se hlohle pelo ya gago, mme mmele wa gago o o šegele bošula; gobane bosogana le hlogo e ntsho ke lefela.