MMOLEDI 5

₁O se ke wa re, o le pele ga Modimo, wa hlaganela go bolela, pelo ya gago ya akgofa ya ntšha lentšu. Gobane Modimo o kua godimong, mme wena o mono faseng. Ke gona mantšu ago e se be a makae. ₂Gobane diloro di tla ka boati bja dipelaelo; le lentšu la botlatla le tla ka boati bja polelo. ₃Ge o enetše Modimo keno, o se diege go e phetha. Modimo ga a kgahlwe ke mašilo; phetha se o se ennego. ₄Go ena, wa lesa go phetha, go kaone ge o sa ene. ₅Se lese molomo wago wa diriša mmele wago sebe; o se tlo bolela le motseta wa re: Ke fošitše! O tlo ba o direlang go rumola Modimo ka puo ya gago? O tlo ba wa senya mediro ya atla tša gago. ₆Gobane diloro tše ntši le puo tše ntši ke mafela. Sa gago a e be go šia Modimo. ₇Ge o ka bona mmotlana a hlakišwa, molao le toko di senywa nageng, o se gakanege; gobane go ne e mogolo kokamabagolo, modiši kokamabohle.

₈Se se humišago naga mo go fela ke ge kgoši e rata mašemo.

₉E a ratago mahumo ga a ore ka ona: mollaboati ga a holege selo. Le tšona ke lefela.

₁₀Mo menono e atago, go ata le ba e jago; mme beng ba yona ba holega kang, ge e se go e bona ka mahlo? ₁₁Boroko bjo bose ke bja modiri, ge a lle ka gonyane le ge e le ka kudu. Mohumi o hlobaetšwa ke go hora. ₁₂Go na le bošula bjo bobe bjo ke bo bonego fa tlase ga letšatši, ke lehumo leo mong wa lona a le beetšego go itshenya ka lona.

₁₃Gobane ge lehumo leo le mo senyegela ka dikotsi, ngwana yo a mo tswetšego o tlo šala a se na le selo. ₁₄Bjalo ka ge a belegwe ke mmagwe a hlobotše, o tlo tloga ka mokgwa woo a tlilego ka wona; o tlo etša mola a etla, a sa swara selo se a itapišeditšego sona. ₁₅Ke bjona bošula ruri, ge a tloga a swana le mola a etla; mme o holegile eng ka ditapišo tša gagwe? ₁₆Matšatši a gagwe ka moka o a fetša e le a leswiswi le a mahlomola a mantši, le a hlokofalo le a go befelwa. ₁₇Se sebotse se nna ke se hweditšego sese: Se se thabišago ke go ja le go nwa, le go kgahlwa ke tše botse o le mo ditapišong tša gago tšohle tše o itapišago ka tšona fa tlase ga letšatši mehla yohle ya bophelo bjago bjo Modimo a go fago bjona. Ke yona kabelo ya gago.

₁₈Motho mang le mang, ge Modimo a mo fa mahumo le menono, a a mo dumelele go di ja le go tšea kabelo ya gagwe go tšona, le go thabela mediro ya gagwe; tšona tše ke neo ya Modimo. ₁₉Gobane yena yo ga a atiše go gopola matšatši a bophelo bja gagwe, ka ge Modimo a mo abetše lethabo la pelo ya gagwe.