MMOLEDI 8

₁Mokamohlale ke mang? Mohlathaditaba ke mang? Bohlale bo thakga fahlogo sa motho, sa tlogwa ke bothata.

₂Nna ke re: Theetša taelo ya kgoši ka baka la keno ye o e ennego ka Modimo. ₃O se akgofe o tloga go kgoši, o se ke wa ema le taba e mpe; gobane kgoši e dira se e se ratago. ₄Lentšu la kgoši le maatla; ke mang a kago re: O dirang? ₅Molatamolao a ka se kwe lentšu le lebe; pelo e bohlale e tseba lebaka la moahlolelo. ₆Gobane tšohle tše di dirwago di na le mohla wa tšona le mokgwa wa tšona; mme motho o atetšwe ke tše mpe. ₇Ga a tsebe tša la ka moswana, gobane ga go e a mmotšago tše di tlogo ba gona. ₈Ga go e a bušago phefo, a kago thibela phefo; letšatši la go hwa ga le na mmuši. Tlhabanong ga go ne tokologo; le sebe ga se phološe mong wa sona.

₉Tše ka moka ke di bone ke iša megopolo le ditiro tšohle tše di dirwago fa tlase ga letšatši lebakeng la ge motho a sa buša motho gore a mo senye. ₁₀Le gona ke bone ba babe ba bolokwa ba goroga; mme baloki ka ba bona ba khuduga felo mo go kgethwa, ba ba ba lebalwa mo motseng. Le tšeo ke lefela.

₁₁Pelo tša bana ba batho di tlala go dira bobe, ka ge go diega kotlo ye e ahloletšwego disenyi. ₁₂Sesenyi se senya galekgolo se phela galelele. Le ge ke realo ke tseba gore bašia-Modimo ba tlo letlegelwa ka ge ba mmoifa. ₁₃Yo mobe a ka se tlelwe ke tše botse; bophelo bja gagwe ga bo telefale bjalo ka moriti ge o gonoga ka ge a sa boife fahlogo sa Modimo. ₁₄Lefela le lengwe la mo faseng, ke ge go na le baloki ba go tlelwa ke tše di loketšego mediro ya ba babe; le gona go na le ba babe ba go tlelwa ke tše di loketšego mediro ya baloki. Mme ka re: Le tšeo ke lefela.

₁₅Nna ka reta lethabo; ka gobane motho fa tlase ga letšatši ga a na se se botse, ge e se go ja le go nwa le go thaba. Tšona tšeo a di be nae ditapišong tša gagwe mehleng yeno, Modimo a sa mo file bophelo fa tlase ga letšatši.

₁₆Ka realo ge ke iša megopolo ke re ke tsebe bohlale, ke re ke bone tše ba itapišetšago tšona lefaseng, ba itlhokiša boroko mosegare le bošego. ₁₇Ka bona, ge tiro tšohle tša Modimo, motho a sa kgone go di hlatha, tšohle tše di dirwago fa tlase ga letšatši. Le ge motho a ka itapiša ka go di latiša, a ka se ke a di fihlela. Le ge mohlale a ka re: Ke a tseba go di fihlela a ka se ke a kgona.