BAEFESO 3

₁Ke ka baka leo nna Paulo ke lego mogolegwa wa Jesu Kriste ka baka la lena bantle. ₂Ge e le tša bolaki, bjo ke bo filwego ka baka la lena, le di kwele; ke ra bolaki bja kgaugelo ya Modimo. ₃Le kwele gore tše e bego e le thopa, ke di tsebišitšwe ka kutollo, ka mo nkilego ka le ngwalela ka boripana. ₄Moo, ge le bala, le ka lemoga gore thopa ya Kriste ke a e tseba. ₅Ke thopa ye e bego e sešo ya tsebišwa bana ba batho ba mabaka a mangwe ka mokgwa wo wa ge e utollelwa Baapostola ba bakgethwa le Baporofeta ka Moya mehleng yeno. ₆Ke yona thopa yeo ya go re bantle le bona ke baji ba bohwa, le bona ke ditho tša mmele o tee le rena, le bona ba lebanwe ke dikholofedišo ka Kriste Jesu, ka Ebangedi.

₇Ke yona Ebangedi ye nna ke lego motseta wa yona ka neo ya kgaugelo ya Modimo, ye ke e filwego ka tiro ya maatla a gagwe. ₈Nna, ke lego e monyenyane go bakgethwa bohle, ke seditšwe ka kgaugelo ye ya go re bantle ke ba anegele Ebangedi ya lehumo le le sa latišegego la Kriste; ₉e be go ba bonegela bohle gore ba bone pušo ya thopa ya Modimo, ye e bego e utilwe go tloga mehleng ya kgalelele, e le thopa ya Modimo Mohlodi wa tšohle ka Jesu Kriste, ₁₀ya go re mehleng yeno bohlale bja Modimo bja mehutahuta bo tsebje ke babuši le ba maatla ka tša magodimong ka phuthego. ₁₁Gore go phethege tše a bego a rerile go di dira ka Jesu Kriste Mong wa rena. ₁₂Ka yena re na le mafolofolo, re na le botseno re holofetše, re dumetše yena. ₁₃Ke ka baka leo ke le rapelago gore le se ke la lapišwa ke ditlaišego tša ka di nkwetšego ka baka la lena, tše le kago kgantšha tšona.

₁₄Ke tšona tše di nkhunamišago ka matolo, ke khunamela Tatago Mong wa rena Jesu Kriste, ₁₅yena tlhago ya botate bjohle bjo bo kago bolelwa legodimong le lefaseng. ₁₆Gore ka lehumo la letago la gagwe a le fe go tielela maatla mothong wa teng ka Moya wa gagwe. ₁₇Gore Kriste a age dipelong tša lena ka tumelo, le be ba ba tsemilego medu leratong. ₁₈Ke mo le tlogo kgona go lemoga lerato la Kriste, bophara bja lona, le botelele bja lona, le go iša ga lona, le go phagama ga lona; la di lemoga le bakgethwa bohle. ₁₉Ke mo le tlogo tseba lerato la Kriste ge e le lebalatsebo, la tlatšwa botlalomoka bja Modimo.

₂₀Gomme yena a kgonago go dira tše di fetišago kgolekgole tše re di kgopelago, le tše re di naganago, ka maatla a a dirago mo go rena, ₂₁a a retwe phuthegong ka Kriste Jesu ke ba meloko yohle ya mehleng ya neng le neng. Amene.