Esitere o ba mohumagadi. Morodekai o ntšha ba ba lakanago go bolaya kgoši
1Ya re ge ditaba tše di diregile, bogale bja kgoši Ahasiwerosi bo šetše bo phohlile, a gopola Wasithi le tše a mo dirilego tšona ka molao woo. 2Gomme masogana a a bego a hlankela kgoši, a re: A kgoši e nyakelwe basetsana ba dikgarebe ba sebopego se sebotse. 3Kgoši e laele bakgoma ba dinaga ka moka tša mmušo wa yona, gore ba kgobele basetsana bohle ba dikgarebe ba dibopego tše botse, ba tle Susani motseng wa mošate, ba išwe ngwakong wa basadi, ba lebelelwe ke Hekai molaki wa mošate molebeledi wa basadi, mme ba newe ditlolo tša go iphorola. 4Gomme mosetsana e a tlogo kgahla kgoši, a bewe mohumagadi legatong la Wasithi.
Lentšu leo la kgahla kgoši; mme gwa dirwa ka mokgwa woo.
5Bjale gona moo motseng wa mošate wa Susani go be go na le monna wa Mojuda; leina la gagwe e be e le Morodekai morwa Jairi, morwa wa Simei, morwa wa Kisi wa leloko la Benyamini. 6O be a thopilwe Jerusalema gotee le mathopša a mohla go thopiwa Jekonya kgoši ya Juda, e a thopilwego ke Nebukadinetsara kgoši ya Babele. 7Mo lapeng la gagwe go be go dutše Hadasa, ke yena Esitere, morwedi wa malomagwe; gobane Esitere, o be a se na tatagwe le mmagwe; gomme mosetsana e e be e le e mobotse sefahlogo le sebopego; mohla go hwago tatagwe le mmagwe, Morodekai a mo tšea ya ba morwedi wa gagwe.
8Bjale ge ba kwile lentšu la kgoši le molao wola wa yona, basetsana ba bantši ba šetše ba kgobetšwe Susani motseng wa mošate ba lebelelwa ke Hekai, le Esitere a išwa ngwakong wa kgoši a lebelelwa ke Hekai molebeledi wa basadi. 9Gomme mosetsana e a mo kgahla, mme a mo dira ka botho; a akgofa a mo nea ditlolo tša go iphorola, le dijo tša gagwe; a mo hlaolela balata ba ba šupago ba basetsana ba mošate, a mo iša ngwakong o mobotse wa basadi a na le basetsana bao ba gagwe.
10Fela molaki eo, Esitere ga a ka a mmotša setšhaba sa gabo le moloko wa gagwe; gobane Morodekai o be a mmoditše a re a se ke a ipolela. 11Ka tšatši le lengwe le le lengwe Morodekai a tla, a feta ka mo seferong sa lapa la ngwako wa basadi, gore a kwe ka mo Esitere a phelago ka gona, le tše di kago mo diregela.
12Bjale go be go fela go etla letšatši le e mongwe wa basetsana bao a bego a tsena go kgoši Ahasiwerosi; ke ge a šetše a feditše dikgwedi tše di selelago a iphorola ka makhura a mira, mme a fetša dikgwedi tše di selelago gape, a tlola ka ditlolo tše dingwe tša go iphorola. 13Mosetsana ge a tsena go kgoši, o be a išwa ngwakong wa basadi, a newa tšohle tše a di ratago, a tšwa natšo ge e eya go kgoši. 14Ge a tsena ka mantšiboa, a tšwa ka moswana a ya ngwakong wa bobedi wa basadi wo o bego o lakiwa ke Sasakasi molakangwako wa kgoši, molebeledi wa basadi ba direthe. Gona moo o be a sa hlwe a etšwa a ya go kgoši, ge e se ge a kgahlile kgoši mme a bitšwa ka leina la gagwe.
15Esitere morwedi wa Abihaile maloma Morodekai, e a bego a mo tšere a ba morwedi wa gagwe, ge go fihla sa gagwe sebaka sa go tsena go kgoši, a se ke a nyaka se sengwe, ge e se tše di boletšwego ke Hekai molakangwako wa kgoši, molebeledi wa basadi; gomme Esitere a kgahla bohle ba ba mmonego. 16Esitere, kua ngwakong wa kgoši Ahasiwerosi, ngwakong wa bogoši, o tsene ka kgwedi ya lesome, ya Tebethe, ka ngwaga wa go šupa ga mmušo wa gagwe. 17Gomme kgoši ya rata Esitere mo go basadi bohle; ya mo dira ka botho le boleta, ya mo hlaola mo go dikgarebe ka moka, ya ba ya mo rweša mofapahlogo wa bohumagadi hlogong, ya mo dira mohumagadi legatong la Wasithi. 18Gomme kgoši ya direla bakgoma ba yona le bahlanka ba yona ka moka monyanya o mogolo, ya ba monyanya wa Esitere; ya fokoletša dinaga lekgetho, ya ntšha dineo ka mokgwa o swanetšego kgoši.
19Ka lebaka le lengwe ge go kgobokanywa dikgarebe la bobedi, Morodekai o be a dutše kgorong ya mošate. 20Ke ge Esitere a šešo a bolela moloko wa gagwe le setšhaba sa gabo, ka mo a bego a laetšwe ke Morodekai; gobane Esitere o be a sa fela a dira ka taelo ya Morodekai, go etša mola a sa dutše lapeng la gagwe.
21Mehleng yeo ya ge Morodekai a dutše kgorong ya kgoši, go be go na le bahlanka ba babedi ba mošate, Bikithani le Therese, baletakgoro, ba ba bego ba hloile kgoši Ahasiwerosi, ba mo lakana ba re ba mo iše diatla. 22Morodekai ge a sebelwa taba ye, a botša mohumagadi Esitere; mme Esitere a e fihliša go kgoši a romilwe ke Morodekai. 23Ya re ge ba latiša taba yeo, ba hwetša e le therešo; mme banna ba babedi bao ba fegwa kwateng. Gomme taba tšeo tša ngwalwa mo pukung ya ditaba tša kgoši.
