ESITERE 3

₁Ditaba tše ge di diregile, kgoši Ahasiwerosi a godiša Hamani morwa wa Hamedatha wa Agagi, a mo dira e mogolo, sedulo sa gagwe a se bea pele ga bakgoma bohle ba gagwe. ₂Bahlanka bohle ba kgoši ba ba bego ba le mošate ba khunama ba lotšha Hamani; Morodekai yena a se ke a khunama a inamela fase. ₃Bahlanka ba kgoši ba kgorong ya mošate ba bolela le Morodekai ba re: O reng o nyatša molao wa kgoši? ₄Ba fela ba realo ka mehla, yena a sa kwe; ba ba ba botša Hamani taba ye gore ba bone ge mantšu a Morodekai a ka tia; ka gobane o be a ba boditše a re: Ke Mojuda! ₅Bjale Hamani ge a bona Morodekai a sa khuname a mo lotšha, a tlalwa ke pelo. ₆Gomme a nyatša go ka swara Morodekai a nnoši, ka gobane ba be ba mmoditše setšhaba sa ga boMorodekai; mme a eleletša go fediša Bajuda ka moka ba mmušong wa Ahasiwerosi ka ge e le ba ga Morodekai.

₇Bjale ka kgwedi ya pele ya Nisani ka ngwaga wa lesome la metšo e mebedi wa pušo ya Ahasiwerosi, ba thoma go laola ka ditaola pele ga Hamani; ba fela ba dira bjalo ka mehla, ya ba gwa fela dikgwedi gwa tla ya lesome la metšo e mebedi ya Adara.

₈Ke mo Hamani a boletšego le kgoši Ahasiwerosi a re: Go na le setšhaba se se dutšego se gašane gara ditšhaba tša mmušo wa gago ka moka; molao wa sona ga o swane le molao wa ditšhaba tše dingwe; le gona ga se dire ka molao wa kgoši. Ga go a swanela kgoši ge batho bao ba ka fo leswa. ₉Ge kgoši e ka dumela, a go ngwalwe lengwalo la gore ba fedišwe. Gomme nna ke tlo ntšhetša bahlanka ba kgoši disilifera tše e ka bago diponto tše diketekete tše tharo le makgolo a šupago a nago le masome a mahlano a dikete, tša tšhelwa mo polokelong ya mahumo a kgoši.

₁₀Ke mo kgoši e rotšego palamonwana seatleng sa yona, ya e nea Hamani morwa wa Hamedatha wa Agagi, lenaba leo la Bajuda. ₁₁Kgoši ya bolela le Hamani ya re: Tšhelete yeo e tlo ba ya gago; le setšhaba seo ke se gafetše wena, gore o se dire ka mo o ratago.

₁₂Ke moka bangwadi ba kgoši ba bitšwa ka tšatši la lesome la metšo e meraro la kgwedi ya pele; gwa ngwalwa tšohle tse Hamani a di bolelago; tša ngwalelwa bakgoma ba kgoši le babuši ba dinaga ka moka, ka mmolelo wa setšhaba se sengwe le se sengwe; gwa ngwalwa ka leina la kgoši Ahasiwerosi; gwa gatišwa ka seka sa palamonwana ya kgoši. ₁₃Mangwalo ao a išwa dinageng ka moka tša kgoši ka bakganyeši, gwa thwe; Bajuda ka moka, ba bafsa le ba bagolo, le bana le basadi, ba fedišwe, ba bolawe, ba senywe ka tšatši letee la lesome la metšo e meraro la kgwedi ya Adara, mme thoto ya bona e tšewe ka moka. ₁₄Gomme lengwalo le be le re: Go bewe molao dinageng ka moka, o goelelwe ditšhabeng ka moka, gore ba itokišetše tšatši leo.

₁₅Bakganyeši bao ba wela tsela ba kitima ka ge ba romilwe ke kgoši. Gomme molao woo wa goelelwa le mo Susani motseng wa mošate. Ge e le kgoši le Hamani ba be ba duletše go nwa, mola motse wa Susani ka moka o gakanegile.