Esitere o laletša kgoši. Hamani o hloile Morodekai
1Ka tšatši la boraro Esitere a apara tša bohumagadi, a ya a ema ka lapeng la ka gare la ngwako wa kgoši. Kgoši e be e dutše sedulong sa bogoši ka ngwakong la bogoši, a lebane le mojako wa ngwako. 2Ya re ge kgoši e bona mohumagadi Esitere a eme lapeng, kgoši ya mo lebelela ka botho, ya mo šupa ka lehlotlo la gauta wa bogoši, le e bego e le swere. Ke moka Esitere a batamela a kgwatha nthla ya lehlotlo. 3Kgoši ya mo rera ya re: Esitere mohumagadi, wene o nyakang? O kgopelang? Le ge e ka ba mphapha wa mmušo, o ka newa.
4Esitere a re: Ge kgoši e ka dumela, gona kgoši a e ke e tle le Hamani lehono selalelong se ke tlo se lokišetša kgoši.
5Kgoši ya re: Napeng le bitše Hamani, gore re dire se Esitere a se bolelago. Gomme kgoši le Hamani ba tla selalelong se Esitere a se lokišitšego. 6Ya re ge kgoši e šetše e nwile beine, ya botšiša Esitere ya re: Se o se kgopelago ke eng? O tlo fiwa se o se lopago; le ge e ka ba mphapha wa mmušo, o ka newa.
7Esitere a fetola a re: Kgopelo ya ka, se ke se nyakago ke re: 8Ge mahlo a kgoši a ntebeletše ka botho, gomme ge kgoši e ka dumela go nnea le go dira se ke se kgopelago, gona ke re: A kgoši e ke e tle le Hamani selalelong se ke tlogo ba direla sona; gomme ka moswana ke mo ke tlogo kgona go bolela se kgoši e mpotšišago sona.
9Hamani mohla woo ge e etšwa, o be a thabile a natefetšwe. Bjalo ge a tla ka mo kgorong ya kgoši, a bona Morodekai a sa mo hlomphe selo, a mo gerula; Hamani a tlalwa ke pelo ka baka la Morodekai. 10Fela, a itshwara, a ya ngwakong wa gagwe, a bitša bagwera ba gagwe le Seresa mosadi wa gagwe. 11Bona bao a ba anegela tša letago la lehumo la gagwe, le tša barwa ba gagwe ba bantši, le tšohle tše kgoši e mo godišitšego ka tšona, ya mmea gore a buše bakgoma le bahlanka ba kgoši. 12A re: Le mohumagadi Esitere, selalelong se a se diretšego kgoši, ga a ka a laletša e mongwe, ge e se nna le kgoši. 13Fela tšeo ka moka ga di nkuše pelo, ge kgorong ya mošate ka mehla ke sa fela ke bona go dutše Morodekai Lejuda leo.
14Seresa mosadi wa gagwe le bagwere ba gagwe ka moka ba mo rera ba re: A go tsengwe kota e telele ya meelo e masome a mahlano, gomme kgoši e botšwe ka moswana gore ba fege Morodekai go yona, o tsebo ya selalelong le kgoši o thabile.
Lentšu le la kgahla Hamani; a napa a laela a re kota yeo e tsengwe.
