EKISODO 32

₁Setšhaba ge se bona Moshe a diega go boa thabeng, sa bokanela Arone sa re: Ema, o re direle modimo o re etago pele; ka gobane Moshe yo, monna e a re khudušitšego Egipita, ga re tsebe se se mo diregetšego.

₂Arone a fetola a re: Kgaolang mangina a gauta a lego ditsebeng tša lena, le tša barwa ba lena, le tša barwedi ba lena; mme le a tliše go nna. ₃Setšhaba sa napa sa kgaola mangina a lego ditsebeng tša bona, ba a tliša go Arone. ₄Yena a a amogela diatleng tša bona, a seta ka moseto, a dira namane e tšholotšwego ka ona.

Bona ba re: Hee Isiraele! Šo modimo wa gago, wo o go ntšhitšego nageng ya Egipita!

₅Arone ge a bona tšeo, a aga aletare pele ga namane yeo, a hlaba mokgoši a re: Bosasa go tlo ba le monyanya wa Morena. ₆Ka la ka moswana ba tsoga e sa le bošego, ba hlaba dihlabelo, ba tliša ditebogo. Setšhaba sa dulela go ja le go nwa, sa tsebo ema sa bapala.

₇Ke mo Morena a boletšego le Moshe a re: Ema, o fologe, ka gobane setšhaba sa gago, se o se ntšhitšego Egipita, se gobošitše ditaba. ₈Ga se ba diega go lahla tsela ye ke ba laetšego yona. Ba itiretše namane e tšholotšwego. Ba e khunametše, ba e tlišetša dihlabelo, mme ba re: Hee Isiraele. Šo modimo wa gago, wo o go ntšhitšego nageng ya Egipita! ₉Morena a bolela le Moshe a re setšhaba se ke se bone; sese, ke setšhaba sa melala e methata. ₁₀Bjalo ntese, bogale bja ka bo ba tukele, ke ba fetše; gomme wena ke go dire setšhaba se segolo.

₁₁Moshe a phophotha, a bolela le Morena Modimo wa gagwe a re: Morena, go tlo tšwang ge bogale bja gago bo tukela setšhaba sa gago se o se ntšhitšego nageng ya Egipita ka maatla a magolo le ka seatla se sethata? ₁₂Go tlo tšwang ge Baegipita ba tlo bolela ba re: O ba khudušeditše tše mpe, gore o ba bolaye dithabeng, gore o ba fediše mo lefaseng. Boa bogaleng bja pefelo ya gago, o šegame, o se dire bošula bjoo bjo o bo beetšego setšhaba sa gago. ₁₃O se lebale Aborahama le Isaka le Isiraele, bahlanka ba gago ba o ba enetšego ka leina la gago wa re: Bana ba lena ke tlo ba atiša bjalo ka dinaledi tša legodimong, wa re: Naga ye ka moka ye ke e boletšego, ke tlo e fa bana ba lena, gore e be ya bona neng le neng. ₁₄Gomme Morena a šegama, a lesa go dira bošula bjo a bego a re o tlo bo direla setšhaba sa gagwe.

₁₅Gomme Moshe a fulara, a fologa thabeng a swere diphaphathi tše pedi tša maswika a melao. Maswika ao a be a ngwadilwe thoko tšohle tše pedi, ka thoko ye le ka thoko ye. ₁₆Maswika ao a be a dirilwe ke Modimo. Le lengwalo e be e le la Modimo, le le tlokilwego maswikeng.

₁₇Joshua ge a ekwa legoa la setšhaba ge se tlatša mašata, a bolela le Moshe a re: Ke mekgoši ya ntwa kua mešašeng.

₁₈Moshe a re: Ga se mogoo wa dikoša tša bafenyi; ga se modumo wa dikolomelo tša ba ba fentšwego; nna ke kwa modumo wa dipina.

₁₉Ge Moshe a batamela, mešaša, a bona namane, le dipina, mme a tuka bogale, a lahla maswika a a bego a a swere, a a pšhatla patogeng ya thaba. ₂₀A tšea namane yeo ba e dirilego, a e fiša ka mollo, a e šilaganya ya ba lerole, a le gašetša meetseng, a a noša Baisiraele. ₂₁Gomme Moshe a bolela le Arone a re: Setšhaba se se go dirileng ge o se diriša sebe se sekaakaa?

₂₂Arone a re: Mongaka a se tuke bogale. Setšhaba se o a se tseba ge se le sebeng. ₂₃Ba boletše le nna ba re: Re direle modimo wo o re etago pele, ka gobane Moshe yo ga re tsebe se se mo diregetšego. ₂₄Nna ka ba botša ka re: E a nago le gauta, a e role! Mme ba nneela, ka e lahlela mollong, gwa tšwa namane ye.

₂₅Moshe a bona setšhaba ge se ferekane, se ferekantšhwe ke Arone wa go tlo kwerwa ke manaba a sona. ₂₆Ke mo Moshe a ilego a ema kgorong ya mošaša, a re: Yo e lego wa Morena a a tle fa go nna! Mme gwa tla Balefi ba phuthegela go yena. ₂₇Bona bao Moshe a bolela le bona a re: Morena Modimo wa Isiraele o re: Mang le mang a itlhame a sware tšhoša, a putlaganye mešaša go fihla dikgorong tša mathoko ohle, mme a bolaye ngwanabo, le ge e le mogweragwe, le ge e le wa gabo. ₂₈Balefi ba dira se Moshe a se boletšego; gomme mo setšhabeng ka tšatši leo gwa bolawa banna ba e ka bago ba dikete tše tharo. ₂₉Ke mo Moshe a itšego: Lehono ikgafeleng Morena, ka gobane le lwile, monna a lwa le morwa wa gagwe, a lwa le ngwanabo; ke tšona tše di le tlišetšago tšhegofatšo lehono.

₃₀Ka la ka moswana Moshe a bolela le setšhaba a re: Le dirile sebe se segolo; nna bjale ke rotogela go Morena; mohlomong nka le boelanya nae, le sentše ka mokgwa wo. ₃₁Moše a boela, go Morena, a re: Hle Morena! Setšhaba se se dirile sebe se segolo, se itiretše modimo wa gauta. ₃₂Gomme bjale a ko ba lebalele sebe sa bona. Ge o sa rate go ba lebalela gona le leina la ka o le phomole mo pukung ya gago ye o e ngwadilego.

₃₃Morena a fetola a re: Mo pukung ya ka ke tlo phomola la e a nthumotšego. ₃₄Bjale sepela, o iše setšhaba se kua ke go boditšego. O tsebe gore Morongwa wa ka o tlo go etapele; fela, sebe se sa bona ke tlo se lefetša ka tšatši le ke tlogo lefetša ka lona.

₃₅Gomme Morena o se otlile, setšhaba seo, ka baka la ge se dirile namane yeo, ye e dirilwego ke Arone.