EKISODO 34

₁Gomme Morena a botša Moshe a re: Ipetlele diphaphathi tše pedi tša maswika, di etšago tšela tša pele. Mo go ona ke tlo ngwala mantšu a a bego a ngwadilwe maswikeng ala a pele a o a pšhatlilego. ₂Bosasa o be o itokišitše, o namele thaba ya Sinai e sa le bosasa, o eme pele ga ka ntlheng ya thaba. ₃Go se ke gwa ba le e a namelago le wena; go se ke gwa ba le motho e a kago bonala thabeng ka moka; le dihuswane le dikgomo di se ke tša ba tša fulela thabeng yeno. ₄Moshe a betla diphaphathi tše pedi tša maswika, tša etša tšela tša pele; a tsogela e sa le bosasa a namela thaba ya Sinai, bjalo ka ge Morena a mo laetše; maswika a mabedi o be a a swere ka diatla.

₅Morena a fologa a le lerung, a ema le Moshe gona moo, gomme a kwatša leina la Morena. ₆Morena a feta mo pele ga Moshe, gomme a hlaboša lentšu a re: Morena, Morena, Modimo yo mabobo le kgaugelo, wa go se fele pelo, wa botho bjo bogolo le therešo. ₇Wa go bolokela ba diketekete botho, wa go lebalela batho bokgopo le dikarogo le dibe; fela, a se ke a lesa go otla mosenyi; le go bana le bana ba bana o bala molato wa botatabo, go iša go moloko wa boraro le wa bone.

₈Moshe a akgofa a inama a lotšha, ₉a bolela a re: Mongaka, ge o ntebeletše ka botho, gona Mongaka a nke a sepele a le makgatheng a rena. Ge setšhaba se e le sa melala e methata, gona o re lebalele bokgopo bja rena le dibe tša rena, mme o re dire ba gago.

₁₀Modimo a re: Go lokile! Ke dira kgwerano ge. Setšhaba sa gago ka moka se tlo bona ge ke dira mehlolo ye e sešogo ya ka e dirwa lefaseng ka moka le mo ditšhabeng ka moka. Mme setšhaba ka moka se o nago le sona se tlo bona mediro ya Morena, ka gobane se ke tlogo se dira ke na le wena e tlo ba se se makatšago. ₁₁Itotele tše ke go layago lehono. Ge e le nna, ge o fihla ke tlo raka Baamoro, le Bakanana, le Bahethe, le Bapherese, le Bahefe, le Bajebusi. ₁₂Itote gore o se dire kgwerano le beng ba naga yeo o yago go yona, gore ba se tlo ba moreo ge ba na nago. ₁₃Le uše dialetare tša bona, le robaganye dikokwane tša bona, le reme meremedimo ya bona.

₁₄Gobane wena o se ke wa khunamela modimo o šele; ka gobane leina la Morena ke Mogale, ke yena Modimo yo bogale. ₁₅O se ke wa ba wa dira kgwerano le beng ba naga yeo, gore e se re ge ba otswa ba latela medimo ya bona, ba e tlišetša didimo, ba go bitša mme wa ja didimo tša bona, ₁₆mme barwa ba gago wa tlo ba tšeiša barwedi ba bona; mme ge barwedi ba bona ba otswa ba latela medimo ya bona, ba tlo otswiša le barwa ba gago ba latela medimo yeo ya bona.

₁₇O se ke wa itirela modimo wa seswantšho.

₁₈O hlokomele monyanya wa dinkgwa tše di sa hlabegwago. Ka lebaka le le beilwego la kgwedi ya Abibi o fetše matšatsi a šupago o eja dinkgwa tše di se nago hlabego, bjalo ka ge ke go laetše. Ka gobane kua nageng ya Egipita o tšwile ka kgwedi ya Abibi.

₁₉Maitšibulo ka moka ke a ka; mo diruiweng tša gago o nkgethele maitšibulo a kgomo le a nku. ₂₀Leitsibulo la pokolo o le lopolle ka nku; ge o sa rate, o le thokge molala. Maitšibulo a barwa ba gago o a lopolle ka moka.

Ba se ke ba bonala pele ga ka ba sa swara selo.

₂₁Mediro ya gago o e dire ka matšatši a selelago. Ka la go šupa o khutše, e ka ba ge o lema le ge o buna.

₂₂Monyanya wa dibeke o o dire; ke wa dithakangwaga tša puno ya korong, le monyanya wa go kgobela ge ngwaga o fela.

₂₃Banna ba gago ba bonale gararo ka ngwaga pele ga sefahlogo sa Morena Modimo wa Isiraele. ₂₄Ge ke tlo ba ke rakile ditšhaba ge o fihla, mme ke katološitše mellwane ya gago, go ka se ke gwa ba le e a tlogo kganyoga naga ya gago ge o etile, o ile go bonala pele ga sefahlogo sa Morena Modimo wa gago gararo ka ngwaga.

₂₅Madi a sedimo sa ka o se ke wa a tliša le se se hlabegilwego. Sehlabelo sa Paseka se se ke sa šalela la ka moswana.

₂₆Ngwakong wa Morena Modimo wa gago o iše tša pele tša dithakangwaga tša mašemo a gago.

Putšane o se ke wa e apea ka maswi a mmayo.

₂₇Gomme Morena a botša Moshe a re: Mantšu a o a ngwale; ka gobane ke dirile kgwerano le wena le Isiraele ka mantšu a. ₂₈Moshe o feditše matšatsi a masome a mane le mašego a ona a le fao, a na le Morena, a sa je bogobe, a sa nwe meetse. Mo matlapeng ala a ngwala mantšu a kgwerano, mantšu a lesome.

₂₉Moshe ge a fologa thabeng ya Sinai, ge a boa a swere matlapa ao a melao, o be a sa tsebe gore letlalo la sefahlogo sa gagwe le phadima ka ge a be a bolela le Modimo. ₃₀Arone le Baisiraele ka moka ge ba lebelela ba bona letlalo la sefahlogo sa Moshe le phadima, mme ba boifa go mmatamela. ₃₁Moshe a ba bitša; ke mo Arone le bagolo bohle ba phuthego ba boetšego go yena, mme Moshe a bolela nabo. ₃₂Gwa tsebo batamela Baisiraele ka moka, a ba anegela tšohle tše Morena a mmoditšego thabeng ya Sinai. ₃₃Ge a feditše go bolela nabo, a šira sefahlogo sa gagwe ka lešira. ₃₄Gomme ge a tlile pele ga sefahlogo sa Morena go bolela nae, a tloše lešira go fihla ge a etšwa. Ge a etšwa, a botša Baisiraele tše a di laetšwego; ₃₅Ke mo Baisiraele ba bonego gore letlalo la sefahlogo sa Moshe le a phadima. Moshe a bušetša lešira sefahlogong sa gagwe, a le tloša ge a eya go bolela le Morena.