EKISODO 6

₁Morena a bolela le Moshe a re: Bjalo o tlo bona se ke tlogo se dira Farao; ka gobane o tlo ba nea tsela a dirilwe ke seatla se maatla; o tlo ba a ba raka mo nageng ya gagwe a dirilwe ke seatla se maatla.

₂Modimo o boletše le Moshe a re: Ke nna Morena. ₃Ke iponaditše go Aborahama le go Isaka le go Jakobo ke le Modimo Ramaatla; fela, leina la ka la JEHOFA ke le ke sešo ka ba tsebiša lona. ₄Ke dirile kgwerano le bona ka re ke tlo ba nea naga ya Kanana, naga yela ya madiilelo a bona, ye ba bego ba diiletše go yona. ₅Bjale dikolomelo tša Baisiraele ke di kwile, ge Baegipita ba ba dirile matlapša, gomme ka elelwa kgwerano ya ka. ₆Ke gona botša Baisiraele o re: Ke nna Morena; mme ke tlo le ntšha mothubong wa Baegipita; ke tlo le lokolla botlapšeng; ke tlo le namolela ke emišitše letsogo, le ka dikahlolo tše kgolo. ₇Ke tlo le tšea ka le dira setšhaba sa ka, nna ka ba Modimo wa lena; gomme le tlo lemoga ge e le nna Morena Modimo wa lena e a le ntšhago mothubong wa Egipita. ₈Gomme ke tlo le fihliša mo nageng yela ye nkilego ka ena ka re ke tlo e nea Aborahama le Isaka le Jakobo; Nna Morena ke tlo le nea naga yeo ya ba ya geno. ₉Ditaba tše, Moshe o di boditše Baisiraele, bona ba se ke ba theetša se Moshe a se bolelago, ba hutšologile, ba imetšwe ke mediro.

₁₀Bjale Morena a roma Moshe a re: ₁₁Sepela o botše Farao kgoši ya Egipita o re a lese Baisiraele ba tloge mo nageng ya gagwe.

₁₂Gomme Moshe a bolela le Morena a lebane nae a re: hleng le Baisiraele ga ba kwe ge ke bolela le bona; bjale Farao yena a ka nkwa bjang, nna ke lego wa melomo e methata?

₁₃Gomme Morena a bolela le Moshe le Arone a ba laelela gore ba bolele le Baisiraele, ba bolele le Farao kgoši ya Egipita, mme ba khuduše setšhaba sa Isiraele tloge mo nageng ya Egipita.

₁₄Seba beng ba malapa a leloko la tatabo: Ke barwa ba Rubeni morwa wa pele wa Isiraele, Ke Hanoge, le Palu, le Hetserone, le Karami. Ke bona ba leloko la Rubeni. ₁₅Barwa ba Simeone ke Jemuele, le Jamini, le Ohada, le Jakini, le Tsohara, le Saulo morwa wa mosadi wa Mokanana. Ke bona ba leloko la Simeone. ₁₆Sea maina a barwa ba Lefi ka go hlatlamana ga bona; ke Gerisone, le Kehathe, le Merari. Ge e le nywaga ya bophelo bja Lefi e be e le lekgolo le masome a mararo le nywaga e šupago. ₁₇Barwa ba Gerisone ke Lebeni, le Simei, le meloko ya bona. ₁₈Barwa ba Kehathe ke Amorama, le Jitsehara, le Heburone, le Usiele. Ge e le nywaga ya bophelo bja Kehathe e be e le lekgolo le masome a mararo le nywaga e meraro. ₁₉Barwa ba Merari ke Maheli, le Musi. Ke bona ba leloko la Lefi ka go hlatlamana ga bona.

₂₀Amorama o tšere Jogebeda rakgadiagwe; yena yo a mmelegela Arone le Moshe. Ge e le nywaga ya bophelo bja Amorama e be e le lekgolo le masome a mararo le nywaga e šupago. ₂₁Barwa ba Jitsehara ke Kora, le Nefege, le Sikiri. ₂₂Barwa ba Usiele ke Misaele, le Elisafane, le Sithiri.

₂₃Arone o tšere Eliseba morwedi wa Aminadaba, kgaetšedi ya Nasone; yena yo a mmelegela Nadaba, le Abihu, le Eleasara, le Ithamara. ₂₄Barwa ba Kora ke Asiri, le Elikana, le Abiasafu. Ke bona ba leloko la Bakora. ₂₅Eleasara morwa wa Arone o tšere morwedi wa Putiele; yena yo a mmelegela Pinehase. Ke bona beng ba malapa a leloko la Lefi.

₂₆Moshe le Arone ke bona bao ba Morena a ba boditšego a re: Ntšhang Baisiraele mo nageng ya Egipita ka mašaba a bona. ₂₇Ke bona ba ba boletšego le Farao kgoši ya Egipita gore ba khuduše Baisiraele ba tloge Egipita; Ke bona ba, Moshe le Arone.

₂₈Mehleng yeo ge Morena a bolela le Moshe nageng ya Egipita, ₂₉Morena o boditše Moshe a re: Ke nna Morena. Bolela le Farao kgoši ya Egipita, o mmotše tšohle tše nna ke go botšago tšona.

₃₀Moshe, a lebane le Morena, a re: hleng ke motho wa molomo o mothata; Farao o tlo kwa bjang se ke se bolelago?