HESEKIELE 10

₁Ka re ke sa lebeletše ka bona mo sebakeng sa ka godimo ga Bakerubi go bonala se e kego ke leswika la talamatala, se bonala eke ke sedulo sa bogoši. ₂Morena a bolela le monna yola wa seaparo sa leokodi, a re; Tsena ka moo gare ga maotwana a a rwelego Bakerubi, o gamare magala a mollo a moo gare ga Bakerubi, o a gaše godimo ga motse.

Monna eo ka mmona a tsena moo. ₃Bakerubi ba be ba eme ka thoko ya le letona ya Ngwako, ge monna eo a tsena; gomme lapa la ka gare la tlala leru. ₄Letago la Morena la tloga moo go Bakerubi la tla serepoding sa Ngwako; Ngwakô wa tlala leru, le lapeng gwa tlala phadimo ya letago la Morena. ₅Modumo wa diphego tša Bakerubi wa kwala le lapeng la ka ntle eke ke lentšu la Modimo Ramaatlaohle ge a bolela.

₆Mme monna yola wa seaparo sa leokodi e a boditšwego a thwe a tšee mollo mo gare ga maotwana a ka tlase ga Bakerubi, a tla a ema hleng ga leotwana. ₇Mokerubi e mongwe a le gare ga Bakerubi, a ntšha letsogo a le iša mollong wa ka gare ga bona Bakerubi, a o tšea a o bea diatleng tša monna yola wa seaparo sa leokodi; yena a o swara a tšwa.

₈Mo go Bakerubi, seatla se e kego ke sa notho se be se bonala se etšwa ka tlase ga diphego tša bona. ₉Ge ke lebeletše ka bona maotwana ala a mane a hleng ga Bakerubi leotwana letee le le hleng ga Mokerubi wa lona, a phadima bjalo ka leswika la talamatala. ₁₀Maotwana, bone bja ona a swana, a bonala eke leotwana le tsenane le leotwana. ₁₁Ge a sepela a lebile thoko tše nne tša ona, a be a sa retologe, mo a yago a be a latela yeo a bego a le pele, a ya a sa retologe. ₁₂Gomme mo gohle mebeleng ya bona, le mekokotlong, le matsogong, le mo diphegong, le mo maotwaneng a bona, go be go tletše mahlo, maotwaneng a mane ao a bona. ₁₃Maotwana ona, ka kwa ka ditsebe tša ka, ge go thwe ke “Disesedi”.

₁₄Bakerubi bohle ba be ba na le difahlogo tše nne tše nne. Sefahlogo sa pele e be e le sa Mokerubi; sa bobedi e be e le sa motho; sa boraro e be e le sa tau; sa bone e be e le sa lenong. ₁₅Gomme Bakerubi ba hlatloga. Ke tšona diphedi tše nkilego ka di bona nokeng ya Kebara. ₁₆Ge bona Bakerubi ba sepela, le ona maotwana a be a sepela a bapetše le bona. Ge Bakerubi ba phurolla diphego ba hlatloga ba gatoga lefase, maotwana a be a sa tloge hleng ga bona. ₁₇Ge Bakerubi ba ema, le ona maotwana a be a ema; ge ba hlatloga le ona a kukega, gobane moya wa diphedi le go ona maotwana o be o le gona.

₁₈Gomme letago la Morena la tloga moo serepoding sa Ngwako, la ya la ema ka godimo ga Bakerubi. ₁₉Bakerubi ba na ba phurolla diphego tša bona ba hlatloga ba gatoga lefase, ka ba bona ba tloga, maotwana a le hleng ga bona; ba ya ba ema mojakong wa kgoro ya Ngwako wa Morena e lebilego bohlabela, ba ukametšwe ke letago la Modimo wa Isiraele. ₂₀Ke tšona diphedi tšeo nkilego ka di bona nokeng ya Kebara, di le ka tlase ga Modimo wa Isiraele; ka tseba gore ke bona Bakerubi bala.

₂₁Ba be ba na le difahlogo tše nne le diphego tše nne; gomme ka tlase ga diphego tša bona go be go le tše e kego ke diatla tša motho. ₂₂Le lebopo la difahlogo tša bona e be e le lona lela ka go le bona kua nokeng ya Kebara. Lebopo la bona, le bona ka noši, e be e le bona bala. Ba sepela ba ya mo difahlogo tša bona di lebilego gona.