Bakaladea ba tlo tšwela Bajuda le Baamoni dira
1Lentšu la Morena le ntletše la re: 2Ngwana Motho! Lebišetša sefahlgo thoko ya borwa, o kgaleme o lebile thoko yeo o porofetele sethokgwa sa šoka la borwa. 3Bolela le sethokgwa sa borwa o re: Kwaa lentšu la Morena! Morena Mong a bohle o re: Ke nna e! Ke tlo tšhuma mollo mo go wene o tlogo fiša dihlare tše tala ka moka mo go wene, le dihlare tše di omilego ka moka. Kgabo ya wona e ka se ke ya tingwa gomme difahlogo ka moka di tlo swa ka yona go tloga kua borwa le go fihla kua leboa. 4Ke mo batho ka moka ba tlogo bona gobane o tšhumilwe ke nna Morena. O ka se ke wa tingwa.
5Nna ka re: Aowii, Morena Mong aka! Batho ba šetše ba mpolela ba re: Motho yo ke mohlabanyepo!
6Ka tlelwa ke lentšu la Morena la re: 7Ngwana motho! Lebišetša sefahlgo Jerusalema, o kgaleme o lebile felo mo go kgethwa, o porofetele naga ya Isiraele. 8O bolele le naga ya Isiraele o re: Morena o re: Ke nna e go tšwela dira ke khwamotše tšhoša segatleng sa yona, gore mo go wene ke fediše baloki le ba babe. 9Ke direla gore ke fediše baloki le ba babe, ge ke khwamola tšhoša ya ka segatleng sa yona ke ewa le batho ka moka go tloga kua borwa go fihla kua leboa. 10Ke mo batho ka moka ba tlogo lemoga ge nna Morena ke khwamotše tšhoša segatleng sa yona; gomme e ka se hlwe e boela gona.
11Bjale wene ngwana motho, rotla o robegile noka, rotla ba go bone o ekwa bohloko. 12E re ge ba ka botšiša ba re: O rotlang? O re: Ke dirwa ke kgoane. Ge di tla, dipelo ka moka di tlo hloboga, ditho ka moka di tlo repha, meoya ka moka e tlo gakanega, matolo ka moka a tlo gakanega, matolo ka moka a tlo nolega moko. Sedio! Di etla! Di a direga! O realo Morena.
13Lentšu la Morena la ntlela la re: 14Ngwana motho! Porofeta o re: Morena o re: Lerumo! Lerumo! Le looditšwe! Le bile le a phadima! 15Le looleditšwe go yo hlaba. Le phadimišeditšwe go gadima. A fa re sa tlo thaba? Molamo wa morwake o nyatša phata tšohle. 16O le neetše go phadimišwa, le tle le swarwe ka seatla, e be rumo le looditšwego, rumo le le phadimago, gore le neelwe mmolai seatleng. 17Lla ge! O hlabe mokgoši, wene ngwana motho gobane lerumo le tlela setšhaba sa ka, le babuši ba Isiraele; bona le setšhaba sa ka ba gafetšwe rumo leo. Ke ka baka leo ke rego: Golola! 18Gobane go lekilwe; fela, go padile. Le wona molamo o nyaditše wa re go ka se tšwe selo. O realo Mong a bohle.
19Bjale wene ngwana motho, porofeta! Phaphatha diatla gobane lerumo le tlo tla gabedi gararo, lerumo la polao; lerumo la polaokgolo le tlo tla la ba dikologa, 20Gore dipelo di gakanege, go ate ba ba wago dikgorong tša bona tšohle. Ke le romile go phadima; joo! Le diretšwe go gadima, le looleditšwe go yo hlaba. 21Retha, o hlabe ka go le letona, o loke, o hlabe ka go la ntsogošo, mo go lebago boelo bja gago. 22Le nna ke tlo opa magoswi, ka phohliša kgalefo ya ka. Nna Morena ke boletše.
23Lentšu la Morena la ntlela la re: 24Wene ngwana motho! Bea ditsela tše pedi tšeo lerumo la kgoši ya Babele le tlago ka tšona. Ke naga e tee mo ditsela di tšwago gona ka dipedi. Mo tsela e thomago o bee sešupatsela, go tsebje motse wa mo e yago. 25Gore lerumo le kgone go loka le eya Rabathe go Baamoni, le loke le eya Juda, Jerusalema motseng o tiiego. 26Gobane kgoši ya Babele e eme maaroganong a ditsela, mo go šimogago ditsela tše pedi tšeo, gore dinoge di mo nogele, go garagašwe mesebe, go botšišwe ditaola, go laolwe ka dibete. 27Ka seatla sa le letona o swere pheko; e šupa Jerusalema, e re a iše dithulamerako, a go hlabele mokgoši ba tšhele lehoa, go bewe dibetša mabje dikgorong, go agelelwe ka merako, go rakelelwe ka dibo. 28Bona ba bona mawa e le a maakaa, mola ba itlemile ka dikeno. Mme yena a se lebale molato wa bona; O tlo ba swara. 29Ke tšona tše Morena Mong wa bohle a di bolelago, ge a re: Le tlo swarwa ka atla se maatla, ka gobane le nkgopotša melato ya lena; dikarogo tša lena di a utollwa; dibe tša lena di bonala ka mediro ya lena ka moka.
30Ge e le wena kgoši ya Isiraele, o mothomobe wa go tlo bolawa, letšatši la gago le etla, le go goma ga makgopo a gago. 31Morena Mong wa bohle o re: Tloša seala, o role mphapahlogo! Dilo tšeo ga se tša selo. Se se kokobetšego se a godišwa; se se phagamilego se a kokobetšwa. 32Mphapahlogo woo ke o beetše go senyega ruriruri; fela, e ka se be moka. Go tlo ba gwa tla e a swanetšwego ke wona, ka o nea yena.
33Wene ngwana motho! Porofeta o re: Morena Mong wa bohle o bolela Baamoni, o bolela dikwero tša bona, o re: Bolela o re: Lerumo! Le khwamoletšwe go bolaya; le looleditšwe go phadima le go hlaba. 34Ba go nogetše maaka; ba go dupetše bofora, gore ba digelwe melaleng ya ditoto tša ba babe ba go tlelwa ke letšatši la bona le go goma ga makgopo a bona.
35Bušetša tšhoša segatleng, ke go sekiše felo moo o bopilwego, nageng yeo ya setlogo sago. 36Ke go ribegetše ka bogale bja ka, ke go tukele bogale wa mollo, ke go gafele atleng tša banna ba sehlogo, bomakgonebagosenya. 37O tlo fela o swele ka mollo; madi a gago a tlo tšhollwa gare ga naga; o ka se hlwe o tsebja ke motho. Nna Morena ke boletše.
