Kotlo ya Tiro
1Ka ngwaga wa lesome le motšo o tee, ka la pele la kgwedi, Lentšu la Morena le ntletše la re: 2Ngwana motho! Ke lefetša tše Batiro ba di boletšego ba era Jerusalema ba re: Kgonenee! Magoro a ditšhaba a robagantšwe! Bjale go buletšwe nna! Go tlo huma nna ge go senyegile motse woo!
3Bjale Morena Mong wa bohle o re: Ke nna e! Ke lwa le wene Tiro! Ke rapa ditšhaba tše ntši, boka lewatle le rapa mafulo. 4Ba tlo tla ba uša merako ya Tiro, ba phušola dibo tša gona. Mme nna, lerole ka gona ke tlo le swiela, gwa šala leswika la fela. 5E le felo ga go thea lokwa lewatleng, ka gobane ke boletše. O realo Morena Mong wa bohle. Tiro go tlo thopša ke ditšhaba. 6Le metsana ya gona ya lešing, e tlo fela ka lerumo, gore ba lemoge ge Morena e le nna.
7Gobane Morena Mong wa bohle o re: Ke nna e! Ke tliša Nebukadinetsara kgoši ya Babele moo Tiro, yena kgoši ya magoši a leboa. O tla ka dipitsi le koloi le banamedi ba tšona, makokokoko a dira. 8O tla thosanya metsana ya gago ya lešing ka tšhoša; wena o tlo go rakelela ka merako, a bopa mmoto a elwa le wena, a go batamela ka dikotse. 9O tlo gereša merako ya gago ka thulamerako, a oba maboto a gago ka kgwega tša tšhipi.
10O tlo ribegetšwa ke marole a mabitsi; mešito ya tšona le ya makoloi, e tlo šišinya merako ya gago, mohla ba go tsena ka dikgoro wa go tsena motse o thopiwa.
11Hlako tša dipitsi tšagwe di tlo gatakanya mapatlelo ago; batho ba gago ba tlo bolawa ka lerumo. Dikokwane tša gago tše di tiilego o tlo di uša. 12Ba tlo thopa mahumo a gago, ba tšea matlotlo a gago, ba uša maboto a gago, ba rutla nywako yago ya mathabo. Dikago tša gago, dikota tša gago, le lona lerole la gago, ba tlo di lahlela lewatleng. 13Ke tlo kgaotša mašata a dikoša tšago; le modumo wa diletšo tšago o ka se hlwe o kwala. 14Ke tlo go dira leswika la fela, felo ga go thewa lokwa lewatleng. O ka se hlwe o agwa, gobane go boletše nna Morena. O realo Morena Mong wa bohle.
15Morena Mong wa bohle o bolela a era Tiro, o re: A dihlakehlake, di ka se šišinyege ka modumo ge o ewa, ka go gokga ga ba hlabilwego, ge mo go wene go gailwa! 16Magoši ka moka a lewatleng a tlo fologa didulo, a apola tša bogoši le matsaka, a apara tšhogo, a dula fase a hlakgasela, a tšhogile tše o di dirilego. 17Ba tlo thuntšha sello ba go llela, ba re: Joo, ga wa senyega ge! Modulabathobamawatle, motsemoretiwa, o bego o ne maatla mawatleng; bona le baagi ba wona, ba bego ba boifša ke ba agilego mawatleng ka moka. 18Bjale ge o wile, hlakehlake di a hlakgasela; hlakehlake tša mawatle di tšhogile, ge o goma o bjalo.
19Ke ka gobane go boletše Morena Mong a bohle, a re: Mohla ke go dira motse wa lešope, wa se hlwe o dulwa, mohla ke rotola meetse a bodiba a go ribegetša, mafulamagolo a go khurumetša. 20Ke tlo go fološa, wa ya go badulasekoting, go setšhaba sa bogologolo, kua nageng ya fasefase, felo ga marope a neng le neng a batheogelasekoting, o se sa tlo dula batho, ke se sa go thakga mo nageng ya ba phelago. 21Ke go dira setšhošetšo, o ka se hlwe o eba gona. O tlo nyakwa mme wa hlokwa neng le neng. O realo Morena Mong a bohle.
