Kotlo ya kgoši ya Tiro, le ya motse wa Sidone
1Lentšu la Morena le ntletše la re: 2Ngwana Motho! Botša kgoši ya Tiro o re: Morena Mong wa bohle o re: Ke lefetša boikgantšho bja pelo ya gago, go re: Ke Modimo! Ke dutše dulo sa modimo gare ga mawatle! Mola o le motho; o se Modimo; o itshema fela wa re: Ke ne pelo ya Modimo! 3Gale o yo bohlale, o phala Daniele; ga go na se kago utagela wene! 4O ikhumišitše ka bohlale bjago, wa kgatela tshipi e khubedu le e tshehla mo polokelong tša gago. 5Ke ka bohlale bjo bogolo bjago, ge o kgobetše mahumo ka dipapatšo tšago. Bjalo pelo yago e itheta ka mahumo ago.
6Bjale Morena Mong wa bohle o re: Ke lefetša boikgantšho bja pelo ya gago, go itshema wa re: Ke ne pelo ya Modimo. 7Bjale ke nna e! Ke go tlišetša ba mathoko, ba ditšhaba tše di šiišago; bona bao ba tlo senya botse bja mahlale ago ba khwamotše tšhoša. Ba tlo goboša bokwala bja gago. 8Ba tlo go kgorometša wa koduma, wa hwa wa kgobetši, o le gare ga mawatle. 9Ge o tlo lebana le ba go bolayago, a o sa tlo fela o re: Ke Modimo? Mola o le motho, o se Modimo, o le matsogong a ba go bolayago. 10O tlo bolawa boka mašoboro ke matsogo a ba šele; ka gobane go boletše nna. O realo Morenag Mong wa bohle.
11Lentšu la Morena la ntlela la re: 12Ngwana motho! Llela kgoši ya Tiro, o mmotše o re: Morena Mong wa bohle o re: Ke wena o bego le tšhupo ya bokwala, o tletše bohlale, o sa hlae bolo. 13O be o dutše Edene tšhemong ya Modimo, o apere ditalama tša mehutahuta, tše khubedu le tše tšhweu le tše tala, le pheta ya thaga, le pheta tša mabala, le tše di phadimago, tša go gongwa ka tša tshipi e khubedu. Ke tše di bego di beetšwe wena mola o hlolega. 14O be o le Mokerubi wa go bewa kgoši, wa monamoledi. Ke be ke go beetše tšona thabeng e kgethwa ya Modimo, mo o bego o sepela gara magakabje maphadimabokamollo. 15E sa le mola o hlolega o be o se molato ditseleng tša gago. Bjale gona o bonala o na le makgopo. 16Pelo ya gago e tletše sehlogo ka go golelwa ke papatšo, mme wa dira dibe. Bjale ge o gobogile, ke go raka mo thabeng ya Modimo, wena Mokerubi wa monamoledi; ke go tloša moo gara magakabje maphadimabokamollo. 17Pelo ya gago e kgantšha botse, wa senya bohlale bja gago o nyaka matsaka. Bjale ke tlo go lahlela fase, ka go dira sebogelo sa dikgoši, di tle di go boge. 18Bosenyi bjago ge bo gola, ge go goboga dipapatšo tšago, ke mo o bego o goboša tše kgethwa tša gago. Nna ke tsoša mollo mo motseng wa gago, gore o go tšhume, gore ke go dire morora mo faseng, wa bonwa ke ba go bonego. 19Bohle ba ba bego ba go tseba ditšhabeng ba go kgotsa, o le setšhšetšo, o ile go ya go ile.
20Lentšu la Morena le ntletše la re: 21Ngwana motho! Lebišetša sefahlogo kua Sidone, o go porofetele. 22O re: Morena Mong a bohle o re: Ke nna e! Ke lwa nago, wene motse wa Sidone; ka wena ke tlo tumišega, gwa tlo tsebja ge Morena e le Nna, ge ke go sekišitše, bokgethwa bja ka bja bonala ka wena. 23Motse wago ke tlo o romela dinkhu, le madi mo mapatlelong a wona; dikgobetši di tlo tlala mo go wona, o dikilwe ke marumo. Ke mo ba tlogo tseba ge Morena e le nna.
24Ge e le ba moloko wa Isiraele, go bona go ka se hlwe go eba le meetlwa e hlabago, le ge e le lebola le le kago tšwa go ba mathoko, ba ba bego ba ba nyatša; gore ba tsebe ge Morena Mong wa bohle e le nna.
25Morena Mong wa bohle o re: Mohla ke phutha ba moloko wa Isiraele ditšhabeng tše ke ba gašanyeditšego mo go tšona, ke mo bantle ba tlogo bona bokgethwa bja ka ka tše ke di dirago Baisiraele. Ba tlo dula nageng ye ke e filego Jakobo mohlanka wa ka. 26Ba tlo dula ba iketlile, ba aga nywako, ba šema merara ba tlo dula ba iketlile, ge ke sekiša ba mathoko ba ba bego ba ba nyatša. Ke mo ba tlogo tseba ge Modimo wa bona e le nna Morena.
