HESEKIELE 35

₁Lentšu la Morena le ntletše la re: ₂Ngwana motho, lebišetša sefahlgo dithabeng tša Seire, o di porofetele, ₃O re: Morena Mong wa bohle o re: Ke nna e! Ke lwa le lena dithaba tša Seire. Ke akalatša letsogo la ka godimo ga lena, gore ke le dire marope le hlaga. ₄Metse ya lena ke tlo e dira matlotloro, la ba hlaga, gore le tsebe ge Morena e le nna.

₅Ke lefetša bonaba bjoo bo sa felego, ge Baisiraele le ba gafela bogale bja marumo mohla wola wa dikotsi, mola go fedišwa molato wa bona. ₆Bjale Morena Mong wa bohle o re: Ka bophelo bja ka! Ke go dira wa madi; madi a tlogo hlomara, ka gobane o nyaditše madi; bjale o tlo hlomarwa ke ona madi. ₇Dithaba tša Seire ke tlo di dira tša marope; ka fediša e a fetago ka gona, le e a boelago gona. ₈Dithaba tša gona ke tlo di dira tša ditoto; mebotong ya gona le meeding ya gona, le dinokeng tša gona tšohle, go tlo rapalala ba ba bolailwego. ₉Ke tlogo dira mašope a go ya go ile; metse ya gago e ka se hlwe e dulwa ke motho. Ke mo le tlogo tseba ge Morena e le nna.

₁₀Ke lefetša tša mola o re: Ditšhaba tše pedi tšeo, le dinaga tše pedi tšeo, e tlo ba tša ka; re tlo di tšea; wa realo mola Morena a dutše mo go tšona. ₁₁Bjale Morena Mong wa bohle o re: Ka bophelo bja ka! Ke tlo go dira tše di lekanego lehloyo la gago le lehufa la gago le o ba dirilego ka lona o le lenaba la bona. Bona ba tlo ntseba ka mokgwa wo ke lefetšago ka wona. ₁₂Ke mo o tlo go tseba ge Morena e le nna, le gore ke kwele maroga, a gago a o rogilego dithaba tša Isiraele ka ona, wa re: E šetše e le marope: di gafetšwe go lewa ke rena. ₁₃Le be le nyatša nna ge le ikgodiša ka melomo ya lena; ge le nkodutla ka dipolelo, ke di kwele.

₁₄Bjale Morena Mong wa bohle o re: Ke tlo go dira naga ya mašope, gore lefase ka moka le thabe, ₁₅Boka mola o thabela go ja bohwa bja moloko wa Baisiraele mola bo thosantše, le wena thaba ya Seire, le naga ya Edomo ka moka, ke tlo le dira tšona tše, la šala le le mašope mo go fela, gwa tlo tsebja ge Morena e le nna.