Kgakolo ya Ntlokgethwa. Monyanya wa Paseka
1Kgoši Dario a laela a re go tsomišwe polokelong ya mangwalo a ditaba tša mmušo, mo go bego go bolokilwe mahumo a Babele. 2Ba hwetša lengwalo kua motseng wa Ahamethe o lego mošate wa naga ya Meda. Lengwalo leo le be le ngwadilwe gwa thwe: Taba ya mmušo. 3Ka ngwaga wa pele wa ge go buša kgoši Korese, kgoši Korese o laetše a re Ngwako wa Modimo wa Jerusalema o agiwe, e be felo mo go tlo go išwa didimo. Metheo ya wona e be e tiilego; leemo e be meelo e masome a selelago; le bophara e be meelo e masome a selelago. 4E hlatlagane e le e meraro ya maswika a magolo. Godimo ga yona go dule wa go agwa ka dikota. Meputso yona e tlo tšwa ngwakong wa kgoši. 5Le dibjana tšela tša gauta le tša silefera tša Ngwako wa Modimo, tše di tšerwego Ntlongkgethwa ya Jerusalema tša išwa Babele, di bušetšwe felo ga tšona Ntlongkgethwa ya Jerusalema, Ngwakong wa Modimo.
6Bjale ge, wena Thathanai mokgoma wa mošowe wa noka, le Setharabosonai le bagwera ba bona ba Afaraseka, le lego mošowe wa noka, kgaoganang le batho bao le ba tlogeleng. 7Modiro woo wa Ngwako wa Modimo lesang o dirwe; mokgoma eo wa Bajuda le bagolo ba Bajuda ba age Ngwako wa Modimo felo ga wona. 8Le gona ke laetše se lena le swanetšego go se dira ba bagolo bao ba Bajuda, gore Ngwako wa Modimo o agiwe, ka re: Mahumong a kgoši a makgetho a mošowe wa noka go ntšhiwe meputso ya banna bao ka go akgofa, gore ba se ke ba diegišwa. 9Tše ba di hlokago, e ka ba dipowana, le ge e le dikwana tša dihlabelo tša Modimo wa magodimo, le mabele, le letswai, le beine, le makhura, ba newe tša tšatši le lengwe le le lengwe ka taelo ya baperisita, go se ke gwa hlaela selo; 10gore ba thuntšhetše Modimo wa magodimo diorelo tše monate, le gore ba rapelele bophelo bja kgoši le bja bana ba gagwe. 11Ke tšona tše di laetšwego; gomme e a kago hlanoša taelo ye, ngwakong wa gagwe go hlomolwe kota, e tsengwe, mme a fegwe mo go yona; gomme ngwako wa gagwe o dirwe sethobolo. 12Gomme yena Modimo yo leina la gagwe le dutšego ntshe, a uše dikgoši tšohle le ditšhaba tšohle tše di kago iša diatla tša hlanoša taelo ye, tša senya Ngwako woo wa Modimo wa Jerusalema. Nna Dario ke laela gore di dirwe ka go akgofa.
13Bjale Thathanai mokgoma wa mošola wa noka, le Setharabosonai, le ba ba bego ba na le bona, ba dira ka go akgofa, ka mo kgoši Dario a laetšego ka gona. 14Bagolo ba Bajuda ba aga; gomme ba tšwelwa ke diatla ka porofeta ya Hagai le Sakaria morwa wa Ido baporofeta; ba fela ba aga ba ba ba phetha ka taelo ya Modimo wa Isiraele, le ka taelo ya Korese, le ya Dario, le ya Arithasasitha dikgoši tša Peresia. 15Ngwako wa phethwa ka la boraro la kgwedi ya Adara, ka ngwaga wa go selela wa pušo ya Dario. 16Gomme Baisiraele, le baperisita, le Balefi, le ba bangwe ba ba boilego bothopša, ba kgakola Ngwako wa Modimo ka go thaba. 17Go kgakoleng ga Ngwako wo wa Modimo ba hlaba dipowana tše lekgolo, le dikgapana tše makgolo a mabedi, le dikwana tše makgolo a mane, le diphoko tše lesome la metšo e mebedi tša seloba sa Baisiraele ka moka, go ya ka palo ya meloko ya Baisiraele. 18Ba beakanya baperisita ka dihlopha tša bona, gore ba direle Modimo wa Jerusalema ka mo go ngwadilwego pukung ya Moshe.
19Batšwabothopša ba dira monyanya wa Paseka ka la lesome la metšo e mene la kgwedi ya pele. 20Ge e le baperisita le Balefi ba be ba ikgethile boka monna o tee; ka moka ga bona ba ema ba thakgafetše, ba hlabela baboabothopša Paseka, ba e hlabela le baperisita bana ba bobona; le bona ka noši ba itlhabela ya bona. 21Baisiraele ka moka ba ba boilego bothopša ba ja Paseka, le bohle ba ba ikgaogantšego le ditšhila tša ditšhaba, ba tla go bona ba nyaka Morena Modimo wa Isiraele. 22Ba dira monyanya wa matšatši a šupago wa dinkgwa tše di sa omelwago, ba o bina ba thabile, gobane Morena o be a ba thabišitše ka go letafatša pelo ya kgoši ya Asuri ya ba thekga modirong wa Ngwako wa Modimo, Modimo wa Isiraele.
