BAGALATIA 4

₁Gomme ke re: Moji wa bohwa ge e sa le ngwana, ga go se a fapanago le mohlanka ka sona, le ge e le yena mong wa dilo tšohle. ₂O sa bušwa ke balebeledi le balaki, gwa tlo ba gwa fihla lebaka le le beilwego ke tatagwe. ₃Le rena, mola re sa le bana, re be re sa le ba go bušwa ke dithutothutwana tša lefase. ₄Ge go tlile phethego ya mabaka a na a roma morwa wa gagwe e a belegwego ke mosadi, a ba wa go bušwa ke Molao, ₅gore a rekolle ba ba bušwago ke Molao, gore re tle re be bana.

₆Gomme ka gobane le le bana, Modimo o rometše Moya wa morwa wa gagwe dipelong tša lena, wona o hlabošago lentšu wa re: Baba! Tata! ₇Bjale, ga o sa le mohlanka, o morwa. Gomme ge o le morwa, ke gona ge o le moji wa bohwa ka Kriste.

₈Ge e le kgale, ka go se tsebe Modimo, le be le direla medimo e sego Modimo. ₉Bjale gomme ge le tsebile Modimo, kaone ke ge nka re: Ge le tsebilwe ke Modimo, le reng le boela dithutothutwaneng tšela tša mathomo tše di fokolago, tše e lego tšhego, la rata go boela la ba bahlanka ka tšona? ₁₀A le rata go ilela matšatši le dikgwedi le mabaka le nywaga? ₁₁Nna ke a boifa gore mo go lena ke itapišeditši lefela.

₁₂Etšang nna, bana bešo, ke a le kgopela, gobane le nna ke tlile ka etša lena. Ga la ka la ntshenyetša selo. ₁₃Le sa tseba gore mohla wola ke le anegela Ebangedi la mathomo, ke be ke fokola mmele. ₁₄Gomme moleko woo le o bonego mmeleng wa ka, ga la ka la nnyatša la ntlhaswa ka baka la wona. Se le se dirilego ke go nkamogela bjalo ka Morongwa, bjalo ka eke le amogela yena Jesu Kriste. ₁₅Tše le bego le re ke lehlogonolo mehleng yela, bjale di ile kae? Ge e le nna nka le hlatsela ka re, ge go ka be go kgonegile, le ka ba le ikgontše mahlo la nnea. ₁₆A ke go re bjale ke le fetogetše lenaba ka ge ke le boditše therešo?

₁₇Batho bao ba le fišegetše, fela e sego ka mokgwa o botse. Ba rata gore le tlogelane le rena, le fišegele bona. ₁₈Se botse e ka ba go fišego ka mokgwa o botse ka mehla, e sego mohla ke na le lena fela. ₁₉Lena bana ba ka, ba ke boelago ke le belega ka bohloko, gore Kriste a be a bopege mo go lena, ₂₀ke rata ge nka ba moo le lena, ka bolela le lena ka lentšu le šele, ka gobane le ntlabile.

₂₁Mpotšeng, lena ba le ratago go bušwa ke Molao, a Molao le a o kwa? ₂₂Go ngwadilwe gwa thwe: Aborahama o be a na le barwa ba babedi; e mongwe o belegwe ke molata; e mongwe a belegwa ke mohumagadi. ₂₃Wa molata o tswetšwe ka nama; wa mohumagadi o tswetšwe ka kholofedišo. ₂₄Ditaba tšeo ke seswantšho. Basadi bao ke kgwerano tše pedi. E nngwe ke ya thaba ya Sinai e tswalelago bohlankeng; ke yena Hagara eo. ₂₅Gobane Hagara ke Sinai thaba yela ya Arabia; gomme e swana le Jerusalema wa bjale, gobane motse woo o bohlankeng le bana ba wona. ₂₆Ge e le Jerusalema wa magodimong wona ke mohumagadi, yena mmago rena bohle. ₂₇Gobane go ngwadilwe gwa thwe: Hlalala wena moopa o sa belegego. Hlalala o hlakele wena o sa tsebego mašoko a pelego; gobane bana ba eo a dulago a nnoši ba atile go fetiša ba eo a nago le monna.

₂₈Gomme lena bana bešo le bana ba kholofedišo, le etša Isaka. ₂₉Gomme le bjale go sa etša mohla wola, ge eo a tswetšwego ka nama a tshwenya e a tswetšwego ka Moya. ₃₀Fela, Lengwalo le reng? Le re: Raka molata eo le ngwana wa gagwe: gobane ngwana wa molata a ka se ke a ja bohwa le ngwana wa mohumagadi. ₃₁Gomme rena ge, ga re bana ba molata; re bana ba mohumagadi.