GENESI 12

₁Morena o boletše le Aborama a re: Tlogela lefase le la geno, le metswalo ya gago, le ngwako wa tatago; o ye nageng ye ke tlogo go laetša yona. ₂Gobane ke tlo go dira setšhaba se segolo, ke tlo go šegofatša ka godiša leina la gago; mme wena o tlo ba tšhegofatšo. ₃Ke tlo šegofatša ba ba go šegofatšago, ka roga ba ba go rogago; mme meloko ka moka ya lefase e tlo šegofatšwa ka wena.

₄Aborama a dira se Morena a mmoditšego sona, a tloga; Loto a tloga le yena. Aborama ge a tloga Harane, e be e le monna wa nywaga e masome a šupago le nywaga e mehlano. ₅O tlogile le Sarai mosadi wa gagwe, le Loto morwa wa ngwanabo, le maruo a bona ka moka a ba bego ba a ruile mo Harane; ba tloga ba leba nageng ya Kanana, mme ba ba ba fihla.

₆Aborama a tsena nageng yeo a fihla motseng wa Sikeme mo sethokgweng sa More. Mehleng yeo mo lefaseng leo go be go agile Bakanana. ₇Gomme Morena a iponatša go Aborama a re: Naga ye ke tlo e nea bana ba gago. Gona moo Aborama o agile aletare ya Morena e a iponaditšego go yena. ₈A khuduga a ya dithabeng tša thoko ya bohlabela bja Bethele, a aga ngwako wa gagwe gona moo, Bethele e le bodikela, Ai e le bohlabela. Le moo a aga aletare ya Morena, a rapela leina la Morena. ₉Aborama a tloga, a sepela a lebile thoko ya borwa.

₁₀E ile ya re ge go wele tlala nageng yeo, Aborama a fologela Egipita go yo diilela ntshe; ka gobane tlala e be e le e thata nageng yeo. ₁₁Ge a batametše go tsena la Egipita, a bolela le Sarai mosadi wa gagwe a re: Ka kgonthe, nna ke tseba ge o le mosadi wa sebopego se sebotse. ₁₂Bjale ge Baegipita ba go bona, ba tlo re o mosadi wa ka, mme ba mpolaya, wena ba go lesa wa phela. ₁₃Bjale a ko bolele o re o kgaetšedi ya ka; ke mo ke tlogo dirwa gabotse ka baka la gago. ₁₄Ka kgonthe, Aborama ge a fihla Egipita, Baegipita ba bona mosadi wa gagwe e le yo botse ka kudu. ₁₅Matona a Farao a mmona, a mo tumiša pele ga Farao; mosadi eo a tšewa a išwa mo lapeng la Farao. ₁₆Aborama yena ba mo dira gabotse ka baka la mosadi eo, a fiwa dihuswana, le dikgomo, le dipokolo, le balata ba banna le ba basadi, le dipokolo, tša ditshadi le dikamela.

₁₇Fela, Farao Morena o mo otlile le ba lapa la gagwe ka dikotlo tše kgolo ka baka la Sarai mosadi wa Aborama. ₁₈Ke mo Farao a biditšego Aborama a re: O ntirile taba mang? O be o reng o sa ka wa mpotša wa re ke mosadi wa gago? ₁₉Ke ka baka lang ge o itše: ke kgaetšedi ya ka? Ka ba ka mo tšea ka re a be mosadi wa ka, mola e le mosadi wa gago. Mo tšee, mme o sepele. ₂₀Gomme Farao a roma banna ba mo felegetša, yena le mosadi wa gagwe, le tšohle tša gagwe.