GENESI 49

₁Bjale Jakobo a bitša barwa ba gagwe a re: Phuthegang, ke le tsebiše tše di tlogo le tlela lebakeng le le tlogo tla. ₂Kgobokanang le theetše, lena Barwa ba Jakobo. Theetšang Isiraele tataweno. ₃Rubeni, wena morwa e mogolo wa ka! O maatla a ka; O wa pele wa ka mola ke sa le lesogana. O senatla ge o tsoga; o senatla maatleng. ₄O fufula o etša meetse. O tšwile bogolo ka go lala malaong a tatago. Mohla wola o a gobošitše. O letše malaong a ka. ₅Simeone le Lefi, bana ba motho o tee. Marumo a bona ke dibetša tša sehlogo. ₆Moya wa ka ga o tsene ge ba loga maano; morero wa bona ga ke na taba nawo; gobane ba feditše batho mola ba befetšwe; ba gobaditše dipoo ka boomo. ₇Dipefelo tša bona a di rogwe, gobane ke bošoro; le bogale bja bona, gobane ke sehlogo. Ke tlo ba kgetheganya mo go la Jakobo; ke tlo ba gašanya go la Isiraele. ₈Juda, wena bana beno ba tlo go tumiša. Diatla tša gago di swara manaba a gago ka melala. O tlo khunamelwa ke bana ba tatago. ₉Juda, tau ya ledumaedi; o boa ka mogoga, morwa wa ka. Patlama o lale wa tau; etša taunamagadi. E ka tsošwa ke mang? ₁₀Molamo wa bogoši o ka se tloge go Juda; lepara la mmuši ga le tloge mo naong tša gagwe, go be go tle Mokhutšiši. Gomme yena yeo ditšhaba di tlo mo kwa. ₁₁Morareng o tlema pokolo ya gagwe; lekaleng la wona o tlema namane ya yona; aparo sa gagwe o hlatswa ka sedila; le kobo ya gagwe e hlapa ka madi a morara. ₁₂Mahlo a gagwe, a bororo ka morara; mme meno a gagwe a šweufala ka lebese. ₁₃Sebulone o tlo aga botong la lewatle, letšibogo la batshedi ba bodiba; o tlo iša lehlakore kua Sidone. ₁₄Isashara ke pokolo ya marapo, mohutama gare ga maraka. ₁₅O natefetšwe ke makhutšo; a bona naga e kgahliša, a iša legetla a rwala; a ba letlapša la sepalo. ₁₆Dani o tlo ahlolela selete sa gagwe; o tlo etša ba bangwe melokong ya Isiraele. ₁₇Dani ke noga tseleng; ke marabe mo mmileng; o loma mešifa ya pitsi, monamedi a we matshomane. ₁₈Morena, ke letetše phološo ya gago. ₁₉Gada, bašwahledi ba tlo mo kata; mme yena o tlo ba raka a ba kata. ₂₀Asere, dijo tša gagwe ke mahura; o tlo ntšha ditsefelamarena. ₂₁Nafutali ke phalaphonyokgi; o kwiša bose ka ditaba. ₂₂Josefa ke lekala la dienywa, lehlogedi la go enywa sedibeng; dithabe di gkwela morako. ₂₃Babetši ba mesebe ge ba mo rumola, ge ba betša ba lwa nae, ₂₄ba hwetša a ngangile bora, a tiile matsogo le diatla, ka go thušwa ke Ramaatla wa Jakobo. A (ditšhegofatšo) di go tlele di etšwa go yena Modiši, go yena Leswika la Isiraele. ₂₅go yena Modimo wa tatago, a a go thuše, go yena Yomaatlakamoka, a go šegofatše ka ditšhegofatšo tše di tšwago godimong, ka ditšhegofatšo tša bodiba bjo bo lego tlase, ka ditšhegofatšo tša matswele le tša teng. ₂₆Ditšhegofatšo tša tatago di feta tšhegofatšo tša botatawešo ba bogologolo, di iša menateng ya kua mebotong ya bosafelego. A di tlele hlogo ya Josefa go yena e a lego mokgethiwa mo go bana babo. ₂₇Benyamini, ke phiri ya sebata. O tsogela go ja se se thopilwego; o tlo lala a arotše dithebola.

₂₈Bona ba, ke bona meloko ya Isiraele e lesome le metšo e mebedi; mme ke tšona tše tatabo a ba boletšego ka tšona mola a ba šegofatša: e mongwe le e mongwe o mo šegofaditše ka tšhegofatšo ya gagwe.

₂₉Ke gona a ba lailego a re: Nna ke tlo tloga ke gorošetšwa go ba gešo. Le mpolokeng le botate kua mphomeng wa tšhemong ya Efurone Mohethe, ₃₀gona kua mphomeng wa tšhemong ya Makapela e bataganego le Mamure, wo Aborahama a o rekilego gotee le tšhemo yeo go Efurone Mohethe, gore e be felwana ga mabitla. ₃₁Gona fao ba bolokile Aborahama le Sara mosadi wa gagwe, Gona fao ba bolokile Isaka le Rebeka mosadi wa gagwe, Gona fao ke bolokile Lea. ₃₂Tšhemo yeo e rekilwe go Bahethe, le mphoma o lego hleng ga yona. ₃₃Jakobo ge a feditše go laela barwa ba gagwe, o bušeditše maoto a gagwe malaong, a felela, a gorogela go ba gabo.