HOSEA 12

₁Ba Efuraimi ba ntika ka maaka; ba moloko wa Isiraele ba ntika ka bofora; Juda yena o sa hlahlatha, a na le Modimo Mokgethwa Mmotegi.

₂Efuraimi o ja phefo, o latela phefo ya bohlabela, o hlwa a hlatlaganya maaka le go senya; ba gwerana le Asuri, makhura a išwa Egipita.

₃Le Juda Morena o na le taba le yena; o tlo otla Jakobo a eya ka tsela tša gagwe; o tlo mo lefetša a eya ka tiro tša gagwe. ₄Yena eo wa go swara mogolwagwe ka serethe ba sa belegwa, a ema senna a katana le Modimo, ₅A katana le Morongwa a fenya a lla a mo rapela. A mo hwetša kua Bethele; a le moo a bolela le rena, ₆Yena Morena Modimo wa mašaba, yo leina la gagwe e lego Jehofa. ₇Bjale wena, boela go Modimo wa gago, o tiiše lerato le molao, o dule o botile Modimo wa gago.

₈Morekiši o swere seelo sa go fora; o rata go fora. ₉Bjale Efuraimi o re: Nna ke humile, ke ruile leruo le legolo. Mo go tšohle tše e lego tša ka go ka se hwetšwe molato wo e lego sebe. ₁₀Ge e le nna Morena Modimo wa gago go tloga nageng ya Egipita, ke tlo buša ke go dudiša mešašeng boka mehleng ya menyanya.

₁₁Ke nna ke boletšego le baporofeta; ke nna ke atišitšego dipono, ka bua ka diswantšho ka baporofeta. ₁₂Bjale Gileada e le ga dibe, gona ba tlo ba lefela. Ge kwa Giligala ba ipega ka dipholo, gona dialetare tša bona di tlo šala e le mekgobo ya maswika mašemong.

₁₃Jakobo mola a tšhabetše nageng ya Arama, yena Isiraele o bile molata a nyaka mosadi, a diša e le go nyaka mosadi. ₁₄Morena a ntšha Isiraele kua Egipita ka moporofeta, mme ba dišwa ke baporofeta. ₁₅Fela, bjale Efuraimi o mo nyamišitše ka tše galakago; madi a a a thutšego a tlo mo gomarela; mme Mong wa gagwe o tlo mo lefetša tša dihlong tše a di dirilego.