HOSEA 5

₁Hee lena Baperisita, kwang! Hee lena ba moloko wa Isiraele, theetšang! Hee ba moloko wa kgoši, sekegang ditsebe! Gobane go sekišwa bolena le lego sefu sa Mitsipa, lokwa le theilego thabeng ya Thabora. ₂Le le moreo wo o epilwego kua Sithima, nna bjalo ke kgati ya go ba otla. ₃Nna, Efuraimi ke a mo tseba; le Isiraele ga a utagala pele ga ka. Ka gobane šedi: Efuraimi o otswitše, mme Isiraele o tšhilafetše.

₄Mediro ya bona e ba šitiša go boela go Modimo wa bona, gobane ba tsenwe ke moya wa bootswa. Mme Morena ga ba sa mo tseba. ₅Boikgogomošo ke bjona bohlatse bja go bega Isiraele; Isiraele le Efuraimi ba tlo ušwa ke bokgopo bja bona; Juda le yena o tlo wa le bona. ₆Ba tlo ya ba nyaka Morena ka dinku tša bona, le ka kgomo tša bona; mme ba tlo mo hloka a ba hladile. ₇Morena ba mo hlanogetše; ba tšwetše bana ba mohuta o šele; bjale kgwedi ye mpsha e tlo ba metša gotee le magae a bona.

₈Letšang diphalafala kua Gibea, le dinaka le di letše Rama! Tlhabang mokgoši Bethe-Abene, le re: Hee Benyamini, o dikwa ka nthago! ₉Efuraimi, mohla wa dikotlo o tlo šala e le lešope. Ba moloko wa Isiraele ke ba botša tše e lego therešo.

₁₀Bakgoma ba Juda ke ba go šuthiša mellwane: bona ke tlo ba thenolela gale bja ka boka meetse. ₁₁Efuraimi o molato; o phumegile ka molao, ka gobane o ratile go latela tšhila. ₁₂Nna go Efuraimi ke tlo etša tshwele, go moloko wa Juda ke tlo ka lephera.

₁₃Efuraimi mola a ekwa bolwetši, le Juda mola a bona sešo sa gagwe, Efuraimi a ya kua Asuri, a roma batseta ba ya go kgoši Radintwa. Yena eo a ka se le fodiše, a ka se le alafe dišo. ₁₄Gobane nna, Efuraimi ke tlo mo tsogela bjalo ka sebata, mme moloko wa Juda ke tlo o tsogela boka tau; ke tlo ba gobatša ka ikela ke ba goga, gwa hlokwa monamodi.

₁₅Ke tlo tloga ka boela felo ga ka. Ba tlo ba ba itshola ba nyaka sefahlogo sa ka. Ba tlo nnyaka ba tlaletšwe.