JESAYA 11

₁Lehlogedi le tlo hloga thitong ya Isai; lekala le le tšwago mo modung wa gagwe le tlo enywa. ₂Moya wa Morena o tlo dula mo go yena, e lego moya wa bohlale, le wa tlhaloganyo, moya wa keletšo le wa maatla, moya wa tsebo le wa go šia Morena. ₃Go šia Morena go tlo mo kgahla; a ka se ahlole ka mo mahlo agwe a bonago; a ka se ripe taba ka mo tsebe tšagwe di kwilego. ₄O tlo ahlolela babotlana ka go se hlaole motho, bahlaki o tlo ba emela ka go loka; lefase o tlo le otla ka kgati ya molomo wagwe, a bolaye e mobe ka moya wa molomo wagwe. ₅Mohlantšhu wa gagwe e tlo ba toko, mme therešo o tlo itlema letheka ka yona. ₆Phiri e tlo dula le kwanyana; nkwe e tlo hutama le putšanyana; namane le tau le pholo di tlo dula felo gotee, di gapše ke mošemanyana. ₇Namagadi le tautshadi di tlo fula gotee, bana ba tšona ba hutame mmogo; mme tau e fula bjang boka kgomo. ₈Ngwana e monyenyane o tlo bapala moleteng wa marabe; wa go tshwa letswele o tlo kgwathiša ihlo la mokopa ka seatla. ₉Go ka se hlwe go dirwa dibe, go ka se hlwe go senywa mo go fela dithabeng tše kgethwa tša ka, gobane go tseba Morena go tlo tlala fase lohle boka meetse ge a nabile lewatleng.

₁₀Mehleng yeo lehlogedi la modu wa Isai le tlogo tsengwa sefoka sa ditšhaba, le tlo nyakwa ke bantle, mme bodulo bja lona e tlo ba letago. ₁₁Mehleng yeo mong a bohle o tlo buša a emiša atla sagwe, a rekolola mašalela a setšhaba sagwe a a šaletšego kua Asuri le kua Egipita, kua Patorose le kua Kuše le Elama, le kua Sineara le Hamathe le dihlakehlakeng tša lewatle. ₁₂Ke mo a tlogo tsemela bantle sefoka; mme balelekwa ba Isiraele, le ba Juda ba ba thosanego, o tlo ba kgoba ba boa dithokong tše nne tša lefase. ₁₃Ke mo go tlogo fela tseba ya Efuraimi, gwa tlo fedišwa ba go pateletša Juda. Efuraimi a ka se hlwe a hufegela Juda; mme Juda a ka se hlwe a pateletša Efuraimi. ₁₄Ba tlo fofa ba ya bodikela, ba tsokama magetleng a Bafilisita; ba tlo lakana ba yo thopa ba bohlabatšatši, ba tlo tšea la Edomo le Moaba; gomme Baamoni e tlo ba balata. ₁₅Leleme la lewatle la Egipita Morena o tlo le gopiša; noka ya gona o tlo e emišetša tsogo lagwe, mme ka maatla a moya wa gagwe o tlo e palakanya ya tšwa nokana tše di šupago, tša go tlo selwa go rwelwe dieta. ₁₆Ke mo mašalela a tšhaba sagwe, a go šadišwa ke Asuri, a tlogo ba le tselakgolo, e etšago yela ya Isiraele mehleng ya ge ba etšwa nageng ya Egipita.