JESAYA 14

₁Gobane Morena o tlo gaugela ba Jakobo, o tlo buša a itlhaolela ba Isiraele. O tlo ba goroša magaeng a bona; le ba mathoko ba tlo putuka nabo ba gomaretše ba moloko wa Jakobo. ₂Ba ditšhaba ba tlo ba tšea ba ba iša madulong a bona; ba moloko wa Isiraele ba tlo ba rua ya ba balata ba bona, ba thopa bathopi ba bona, ba buša bao ba bego ba ba tlaiša.

₃E tlo re mohla woo Morena a go gorošitše o etšwa mo o bego o hlakišwa o tlaišwa, a go khutšiša bohlanka bjo bothata bjo o bego o hlankišwa bjona, ₄O tlo hlaba sefela sa kgoši ya Babele wa re:

O khutšišitšwe ka mokgwa ofe, Matlaiše? Ditlaišo di khutšitše. ₅Morena o robile lepara la yo mobe, molamo wa mmuši, ₆Moitiabatho ka mapelompeta a sa fetše, mohlakišadilete sehlogo, mohlomari mosagoma. ₇Bjale le letše le iketlile lefase ka moka; mokgolokwane e a hlaga. ₈Go nyankela le megobogobo, merokwana ya kua Libanoni ya re: Bjale ge o letše ga re sa tlelwa ke moremi!

₉Bodulabahu kua fasefase o tsošitše mpherefere wa go go gahlanetša ge o theogela gona; diriti tša go phafogela, diphoko tša lefase lohle; gwa tsošwa dikgoši tša ditšhaba ditulong tša tšona. ₁₀Ka moka ga bona ba go dumediša ba re: Ea, gale le wena o fokotše boka rena? O bile o swana le rena? ₁₁Bo lahletšwe mono moleteng boikgantšho bjago, le modumo wa diletšo tšago. Bolao o bo aletšwego ke go bola; kobo yago ke diboko.

₁₂O wile bjang magodimong, wene Mahlapholane morwa a mahuba! O digetšwe fase bjang, Mohlakiša diletelete! ₁₃Pelo yago e be e re: Ke tlo rotogela kua legodimong, ke yo phagamiša dulo sa ka sa bogoši kua godimo ga dinaledi tša Modimo, wa re ke yo dula Thaba ya molaka, morumo wa leboa. ₁₄O be o re: Ke yo dula kua go itlhophilego maru, ke yo etša Yogodimodimo. ₁₅Mme o kgoromeleditšwe mono go dulago bahu, fasefase sekoting.

₁₆Ba ba go bonago ba go boga, ba go lebeleša ba re: A ga se yena monna yola mošiši nyašako, mothubamebušo? ₁₇A ga se yena mohlolamašokamogohle, tšhwalalanyametse ya gona, wa go gana ge batlengwa ba boela gae? ₁₈Ge e le magoši a ditšhaba a ithobaletše ohle wa serena mabitleng a gao. ₁₉Ge e le wena o lahlilwe kgole le lebitla lago, bjalo ka lekala le le lahliwago; o hlahlaganywa le ba ba bolailwego, ba ba hlabilwego ka lerumo, ba hlahlelwa mphatšeng wa leswika, e le topo tše gatakilwego. ₂₀Ga o yo bolokwa le batho lebitleng, ka ge o sentše naga yago, o bolaile batho bago. Mohuta wa disenyi a o se bolelwe neng le neng! ₂₁Bana ba gagwe a ba išwe polaong ka baka la bosenyi bja tatabo, ba se tlo tsoga ba tšea lefase, ba tlatša legohle ka metse ya bona.

₂₂Ke tlo tsoga ka lwa nabo! O realo Morena wa mašaba. Kua Babele ke fediša leina le mašalela, le mahlogedi a thito le a modu! O realo Morena. ₂₃Ke go dira tšaba la dinoko le megobe ya meetse; ke tlo go swiela ka leswielo la go šwalalanya! O realo Morena wa mašaba.

₂₄Morena wa mašaba o enne a re: Ge go sa direge tše ke di gopotšego, ge go sa tšwelele tše ke di rerilego, e tlo ba e se nna! ₂₅Baasuri ke tlo ba robaganya nageng ya ka, ke tlo ba gatakanya thabeng tša ka, gore joko ya bona e tloge go setšhaba sa ka, se rolwe morwalo wa bona magetleng a sona. ₂₆Ke wona morero wo o reretšwego lefase ka moka, ke lona letsogo le emišitšwego godimo ga ditšhaba tšohle. ₂₇Gobane tše Morena wa mašaba a di boletšego, ke mang a kago di thibela? Ge a emišitše tsogo lagwe, ke mang a kago le gomiša?

₂₈Ka ngwaga wo kgoši Ahasi a hwilego, go tšweletše moeno wo:

₂₉Lena Bafilisita ka moka! Se thabeng ge go robega kgati ye e bego e le otla; gobane mo modung wa noga go tlo tšwa mokopa; mme ngwana wa wona o tlo ba mokebe o fofago. ₃₀Ke mo babotlana ba tlogo fudiša tša maitšibulo; gwa lala badiidi ba iketlile. Wa lena modu, wona ke o bolaiša tlala, e tlogo fediša mašalela a lena.

₃₁Hee wene kgoro! Hlaba sello! Hee wene motse! Jajarega! Hee naga yohle ya Filisita! Hlakgasela, gobane go kubuga muši o etšwa leboa; gomme dira tšeo ga di na e a lapilego.

₃₂Batseta ba setšhaba seo ba botšwang? A ba thwe: Tsione go theilwe ke Morena; ke mo babotlana ba setšhaba sagwe ba tlogo khuta gona.