JESAYA 17

₁Moeno moela Dameseko. Tsebang gore Dameseko o tlo širošwa ya se hlwe e eba motse, e tlo ba marako. ₂Metse ya Aroere e tlo ba marope, e le mahutamo a mehlape, go se na e a e rakago. ₃Efuraimi o hlokišwa sebo; Damaseko go amogwa mmušo; mašalela a ba Siria a tlo dirwa se se dirilwego letago la Baisiraele. O realo Morena wa mašaba. ₄Mehleng yeo letago la Jakobo le tlo nyamelela, mme mmele wagwe o nonnego o tlo ota. ₅Go tlo etša mola mmuni a swara lebele a ripa, go topša diako moeding wa Refaimi. ₆Go tlo šala dipudutša, boka mola go hlothilwe tlhware, mme gwa šala tše pedi tše tharo makaleng, goba tše nne, le ge e le tše tlhano mo thabeng di bego di emule. O realo Morena Modimo wa Isiraele.

₇Mehleng yeo batho ba tlo lealetša mahlo ba nyaka Mmopi wa bona; ba tlo llala ba lebeletše Mokgethwa wa Isiraele. ₈Ba ka se hlwe ba lealetša mahlo ba nyaka tša dialetare tše ba itiretšego tšona ka diatla. Ba ka se hlwe ba šetša tše ba ipopetšego tšona ka menwana, dikokwane tša medimo le swantšho tša letšatši.

₉Mehleng yeo metse ya bona ya dibo e tla ka marako a mo lesoding, a etšago ala a a tlogetšwego mola Baisiraele ba fihla; e tlo ba marope.

₁₀Ka gobane o lebetše Modimo Mophološi wago, o sa ka wa gopola lentswe la gago la setšhabelo. O itiretše dirapana tša matsaka, wa bjala dibjalo tša naga di šele. ₁₁Mola o bjala wa di babalela, tša hloga tša ntšha matšoba ka moso; gomme mohla woo wa dihlokofatšo, wa bolwetši bjo bo sa folego, o ka se bune selo.

₁₂Kotsi e tlo wela mašaba a dilete tše dikgolo, ao modumo wa ona o lego bjalo ka modumo wa lewatle, le mašata a merafo a e kego ke a meetse a magolo. ₁₃Ditšhaba di na le mašata a e kego ke a meetse a magolo. Fela, ge yena a di kgalemela, di tšhabela kgole, di lelekwa boka mooko dithabeng o tšerwe ke phefo, boka lerole ge le dikološwa ke sesesedi. ₁₄Tše di tlogo šiiša e le mantšiboa šedi; Bošego, le sešo la hlaba, go tlo hwetšwa ba se sa le gona. Ke tšona di tlogo tlela ba ba re thopago; e tlo ba lona lefa la ba re hlakolago.