Kotlo e tlogo tlela Jerusalema
1Moeno moelamoediwadipono. Le hloma bjang ge ka moka ga lena le nametše godimo ga nywako? 2Hee, wene motse wa mašata le mahowa, wene legae la mathabo!
Babolawa ba gago ga ba ka ba bolawa ka lerumo, ga ba hwa ka tlhabano. 3Balaodi bohle ba dira tša gago ba tšhabile, ba tlemilwe ba sešo ba betša mosebe. Bohle ba ba hweditšwego go wene ba tlemilwe, le ge ba tšhabetše kgole. 4Ke gona ke rego: Hle nteseng ke lle gabohloko; Le se phegelele go nkhomotša ge go šwalalantšwe ngwanenyana wa setšhaba sešo. 5Gobane ke letšatši la mašegerepe, la go gatakelwa le go gakanega; ke la Mong a bohle Morena wa mašaba, la moedi wa dipono. Merako e phušotšwe, mekgoši e gala thabeng.
6Elama o swere kgotlopo; ke batho ba makoloi le ba dipitsi; ba Kiri ba swere dikotse. 7Meedi ye e bego e go kgahla, e tletše makoloi; banamedi ba itlhopha dikgorong. 8Lešira le le širilego Juda le a tlošwa.
Mohla woo o tlo yo bona dibetša ngwakong wa sekgwa (1 Dikg. 7:2). 9Le tlo bona diroba tša motse wa Dafida ge e le tše ntši, le tlo thiba meetse a letsha la tlase. 10Le tlo bala nywako ya Jerusalema, la phušola yona le thekga merako. 11Le tlo epa letsha gare ga merako e mebedi, ya ba la meetse a letsha la kgale. Fela, ga le iše mahlo go yena modiri wa tšona; ga le bone mmei wa tšona; go tloga kgaleng.
12Mohla woo Mong a bohle Morena wa mašaba o tlo le biletša go lla le go hloboga, le go dutulwa, le go apara mankgeretla. 13Gomme bonang, go a thabja, go nyakaletšwe, go hlabja dikgomo, go lewa dinama, go nowa morara; ke: A re jeng, a re nweng; bosasa re tlo ba re hwile!
14Mme nna Morena wa mašaba o ntshebetše a re: Le tlo ba la hwa le sešo la lebalelwa wona molato woo! O realo Morena wa mašaba.
15Mong a bohle Morena wa mašaba o re: Sepela o ye go Sebena molaki wa mahumo, molaki wa mošate o re: 16Se e lego sa gago felo fa ke eng? O na le mang fa ge o ikepela lebitla felo fa tletlolo, wa le kgora leswikeng wa re ke legae? 17Tseba gobane Morena o tlo go lahla wa go lahla, Monnati, o tlogo phuthaganyetša ruri. 18O tlo go kgokološa, wa kgokologa boka kgwele. O tlo etša kgwele e tlogo nwa kua nageng ya kgole ya molala, wa yo hwela gona kua. Ke moo go tlogo ya dikoloi tša matsaka, wene molešahlong wa motse wa mong wa gago. 19O tlo kgorometšwa wa tšwa modirong wa gago; o tlo gogwa wa tlošwa bolaking bja gago.
20Mohla woo ke tlo bitša Elyakima morwa wa Hilikia mohlanka wa ka. 21Yena ke tlo mo apeša kobo yago, ka mo tlema ka mohlantšho wa gago; bokgoma bja gago ke tlo bo bea diatleng tša gagwe. Mme yena e tlo ba tatago ba Jerusalema, tatago ba leloko la Juda. 22Sekgonyo sa ngwako wa Dafida ke tlo se bea magetleng a gagwe. O tlo bula, gwa hlokwa motswaledi; a tswalela go tlo hlokwa mmudi. 23Ke tlo mo kgokgothela bjalo ka lebapo felo mo go tiilego, ya tlo ba sedulo sa letago la moloko wa tatagwe.
24E tlo ba yena lebapo la go fegwa bokwala bjohle bja moloko wa tatagwe, bja dibjana tšohle, bja thoto ya megopšana, ba fetša ka thoto yohle ya meeta. 25Bjale Morena wa mašaba o re: Mohla woo lebapo le kgokgothetšwego felo mo go tiilego le tlo tshwamoga la robega la wa, mme morwalo woo o fegilwego mo go lona o tlo senyega; gobane Morena o realo.
