Dikotlo di tlo fediša sebe. Go tlo ema motheo wa Modimo
1Kotsi e tlo tlela botšhepi bja boipoti bja matagwa a Efuraimi, le letšoba le le ponnego, le a ikgantšhago ka lona, la thabeng ya moedi wo o nonnego wa ba go tagwa ke morara. 2Go na le yo maatla, wa kokoto, wa go rongwa ke Morena, mokadimolasefako, sesesedi se se ubulago, mokadimolamafula a a gogolago, wa letsogo la go uša fase. 3Botšhepi bja boipoti bja matagwa a Efuraimi bo tlo gatakelwa ka maoto. 4Le letšoba le le ponnego le a ikgantšhago ka lona, la thabeng ya moedi wo o nonnego, le tlo ka lego la thakangwaga, le motho a sa tšogo le bona a le fula a kwametša.
5Mohla woo Morena wa mašaba e tlo ba yena mofapahlogo wa bokwala le seala sa botšhepi sa mašalela a tšhaba sagwe. 6Moahlodi o tlo mo nea moya wa toko, bogale o tlo bo nea bao ba go thibela manaba dikgorong.
7Le bona ba ba thekesela ka morara, ba phokaela ka sebela, bomphamodimo le baboni ba phokaela ka sebela, ba fenywa ke morara, ba thekesela ka bjalwa, ba thekesela ge ba rera, ba apaapa kahlolong. 8Mo go fela mo ba jago go tletše mahlatša le tšhila, ga go sa le sebaka.
9Yo bjalo a ka ruta mang bohlale? A ka lemoša mang ditaba? A le bana a ka ruta, bona ba sa tšogo tshwa letswele? 10Go thwe: Molao, molao! -- Molao, molao! -- Taelo, taelo! -- Taelo, taelo -- leka fa, moo!
11Hleng setšhaba go bolelwa le sona' ka melomo e goloketšago, ka leleme le le sa kwegego. 12Mola e le sona se se boditšwego gwa thwe: Ke wona molao, šo! Ladišang ba lapilego; ba lapologe fa! Fela, ba ganne go kwa. 13Bjalo ge go thwe: Molao, molao! -- Molao, molao! -- Ge go thwe: Taelo, taelo! -- Taelo, taelo! Ge go thwe: Leka fa, leka moo go bona e ke ke lentšu la Morena, gore ba sepele ba yo wa ka sa nthago ba robege, ba tanywe, ba swarwe.
14Bjalo kwang gee, se Morena a se boletšego, lena banna ba dikwero, le bušago tšhaba se sa Jerusalema. 15Ge le ka re: Re lakane le lehu, re kwane le bodulabahu, la re: Ge go fihla kotlo ya gogola batho, e ka se re fihlele, gobane re khuta ka maaka, re utama ka bofora, 16Bjalo Morena Mong a bohle o re: Ke nna ke beago swika la motheo mo Tsione, swika le tsebjago gore le tiile, la bohlokwa, la go thekga motheo. E a dumelago ga a tšhabe. 17Selekanyi ke bea molao; kelo ke bea toko.
Bokhuto bjola bja maaka, sefako se tlo bo thunthunya. Boutamo bjola bo tlo gogolwa ke mafula a meetse. 18Ge e le molaka wo le rego le o tlemile le lehu, o tlo fedišwa; go kwana le bodulabahu go ka se ke gwa tia; mohla mafula a kotlo a tlago, a tlo le ribegetša. 19Ge a feta, a tlo le gogola; a tlo fihla mehla yohle ge e sa le bosasa, le mosegare, le bošego. Gomme le tlo tšhoga ge le e kwa se le sebelwago sona. 20Gobane malao ke a makopana, ge motho a re ke a naba; kobo e a hlaela, ge motho a re ke apare. 21Gobane Morena o tlo tsoga boka mola thabeng ya Peratsime (2 Sam. 5:17-25), a galefa boka mohla wola moeding wa Gibeoni (1 Koron. 14:13-16); o tlo dira se a se dirago, modiro wo o sešogo wa dirwa.
22Bjale le se ke la kwera, gore tlemo tša lena di se tlo swineletšwa; gobane nna ke kwile lentšu la Morena wa mašaba ge a tiiša a re: Tshenyo e tlo tlela lefase ka moka.
23Theetšang le kwiše lentšu la ka; phafogang le kweng se ke se bolelago. 24A molemi a ka fela a lema ka mehla, ge a re ke tlo bjala? A fa a ka hlwa a kgatha a lema ka mehla? 25A ka se re a lekelantše, a tsebo bjala peu ya lenonya, a bjala dinawa, a bjala mabele le mphogo mo temeng ya gona, le dihlodi malepeng a tšhemo? 26Mokgwa wo o swanetšego o o rutilwe ke Modimo wagwe. 27Bjale lenonya ga le folwe ka sefolo, nawa ga di kgokgošwe ka leswika. Lenonya le a hlohlorwa, nawa di folwa ka phatana. 28Thoro ya dijo ga e pšhatliwe; motho ga a fo tula ka sefolo; ga a fola goba a kgokgoša, thoro ga a e pšhatle. 29Le Morena wa mašaba o dira ka mokgwa woo. Morero wa gagwe ke wa matete; bohlale bja gagwe ke bjo bogolo.
