JESAYA 3

₁Tsebang gobane mong a bohle Morena wa mašaba, fa Jerusalema le fa Juda o tlo tloša tšohle tše holago batho, kholo yohle ya bogobe, kholo yohle ya meetse, ₂Le bagale le banna ba tlhabano, le baahlodi le baporofeta, le didupe le bagolo. ₃Le ditona tša dira, le balaki le bakgoma, le bomakgone ba mediro, le bomatsebe ba bonoge. ₄Ke tlo ba beela bana ya ba bakgoma ba bona; ba tlo bušwa ke bašimanyana. ₅Mo setšhabeng go tlo ba le mojano; monna o tlo ja wa gabo, wa mošimanyana a beela e mogolwane mereba; motho wa segwahla a beela wa senopodi mereba.

₆Gobane motho o tlo phegelela ngwana wabo wa lapeng la rragwe, a re: Wena o sa na le kobo; baa mokgoma wa rena; matlawa a a a bušwe ke wena!

₇Mme yena o tlo re: Nna ga ke moreku; le gona ka lapeng ga ke sa ne dijo le kobo; lesang go mpea mokgoma wa batho.

₈Ke ka ge Jerusalema go kgerega, mme Juda o a wa; gobane ka maleme a bona le ka tiro tša bona ba lwile le Morena, ba befetše mahlo agwe a letago. ₉Difahlogo tša bona di hlatsa molato wa bona; di bega dibe tša bona tše di swanago le tša Sodoma; ga ba di ute. Joo maphelo a bona! Ba ikgogela kotsi.

₁₀Moloki mo rereng, le re: O na le mahlatse ka gobane o tlo ja dikenyo tša mediro yagwe. ₁₁Yo mobe, joo! Tša gagwe di befile, gobane o lefetšwa tše atla tšagwe di di dirilego.

₁₂Joo setšhaba sa ka! Se pateletšwa ke mošemanyana, sebušwakebasadi.

Joo setšhaba sa ka! Bagogi ba gago ba a go timetša, ba senya tsela ye go bego go thwe o e sware.

₁₃Morena o tsogile gore a sekiše; o eme gore a ahlole ditšhaba. ₁₄Bagolo ba setšhaba sagwe, le bakgoma ba sona, Morena o ba tlela ka kahlolo, o re: Tšhemo ye ya merara e llwe ke bolena! Thoto ya mohumanegi e mo nywakong ya lena. ₁₅Le be le hloma bjang ge le thumakanya tšhaba sa ka, le šilakanya batho ba hlakago? O realo Mong a bohle, Morena wa mašaba.

₁₆Le gona Morena o sa re: Barwedi ba Tsione, ka gobane ba ikgantšha, ba tšama ba rwele melala, ba talatatša mahlo, ba re re gata senatla, ba tsirinya mefiri ya maoto, ₁₇Yena Mong a bohle, barwedi bao ba Tsione o tlo ba hloba meriri ya dihlogo, tša tšwa sebabo; Morena o tlo ba hloboša.

₁₈Mohla woo Mong a bohle o tlo ba amoga botšhepi bja maseka le mefapahlogo le mabitsi. ₁₉Le mangina a ditsebe, le maseka a mabogo, le mašira, ₂₀Le mašela a dihlogo, le dingangane tša maoto, le meketwana ya botšhepi, le dibjana tša ditlolo, le dithato, ₂₁Le dipalamonwana, le mangina a dinko, ₂₂Le ditlhamo tša menyanya, le matshela, le dikgolomotho, ₂₃Le diiponi, le mašela a boleta, le dithethengwana, le dikobo;

₂₄Bakeng sa setlolo gwa tla maladu; bakeng sa moruka gwa tla lerala; bakeng sa leetse gwa tla lefatla; bakeng sa šela la matsaka gwa tla lenkgeretla; bakeng sa botsoro gwa tla mabadi.

₂₅Batho ba gago ba tlo tekolwa ke lerumo; bagale ba gago ba tlo fela tlhabanong. ₂₆Dikgoro tša gago di tlo golola di lla; o tlo dula o le lešope faseng leno.