JESAYA 39

₁Mehleng yeo Merodaka-Baladani morwa wa Baladani kgoši ya Babele, a roma batseta ba tla go Hiskia ba swere mangwalo le dineo, gobane o be a kwele ge Hiskia a be a babja. ₂Hiskia a ba thabela, a ba bontšha ngwako wa mahumo a silifera le gauta, le dinoko le ditlolo tše bohlokwa, le ngwako wohle wa marumo, le tšohle tše di bego di le gona dipolokelong tša gagwe. Mo ngwakong wa gagwe, le mo motseng wohle wa mošate gwa se šale selo se a sa kago a ba bontšha sona. ₃Gwa tla Jesaya moporofeta, a bolela le kgoši Hiskia a re: Batho bao ba reng?

Ba tla go wene ba etšwa kae? Hiskia a re: Ba tlile go nna ba etšwa nageng ya kgole; ba tšwa Babele.

₄Jesaya a re: Ba bone eng mo ngwakong wa gago?

Hiskia a re: Ba bone tšohle tše di lego fa ngwakong wa ka. Mo dipolokelong tša ka ga go a šala selo se ke sa kago ka ba bontšha sona.

₅Ke mo Jesaya a itšego: Kwaa lentšu la Morena wa mašaba. ₆O tsebe gore go tlo tla matšatši a ge gona kua Babele go tlo išwa tšohle tše di lego fa ngwakong wa gago, tše di kgobetšwego ke botatago go fihla lehono. Go ka se šale selo. O realo Morena. ₇Le gona ba tlo tšea ba bangwe ba bana ba gago, ba ba tlogo tšwa go wene, ba o tlogo ba tswala, ba ba dira balata ngwakong wa kgoši ya Babele.

₈Hiskia a fetola a re: Lentšu la Morena le o le bolelago ke le botse! A re: A go be le khutšo le potano ge nna ke sa phela.