JESAYA 49

₁Hee lena dihlakehlake! Kwang se ke se bolelago. Hee lena ditšhaba tša kgole! Nthaetšeng! Morena o mpiditše ke sa tšwa go belegwa; mme leina la ka, mola ke sa rwelwe ke mme, o be a le tseba. ₂Molomo wa ka o o dirile tšhoša e boelo o nkhutiša moriting wa seatla sa gagwe; o ntirile mosebe o bogale, a mpea kgotlopong ya gagwe; ₃A bolela le nna a re: O mohlanka wa ka, wena Isiraele; ke tlo ithetiša ka wena. ₄Nna ke re: Ke itapišitše ka lefela, ka senya maatla a ka ka lefelafela; anthe taba ya ka e ema ka Morena, mme moputso wa ka o mo go yena Modimo wa ka. ₅Mme bjale go golela Morena e a mpopilego ka belegwa, ka ba mohlanka wagwe wa go gomišetša Jakobo go yena, o re Baisiraele ba bothwe, ba tle go yena, gobane Morena o mpona ke le wa go godišwa; mme maatla a ka ke yena Modimo.

₆Gape a re: Ge o le mohlanka wa ka, ga go ntekane ge o tsoša mašika a Jakobo fela, wa buša mašalela a Isiraele fela; ke go bea seetša sa ditšhaba, gore phološo ya ka e išwe pheletšong tša lefase. ₇Morena Molopolodi wa Isiraele, Mokgethwa wa gagwe, o bolela le yena monyadiwa yo, mohlaswiwa wa ditšhaba, mohlankišwa ke babuši, o re: Dikgoši di tlo di bona tša tšhoga; bakgoma ba tlo lotšha ka baka la Morena, e lego yena Mmotegi, yena Mokgethwa wa Isiraele e a go kgethilego.

₈Morena o re: Ke go kwa ka lebaka la kgahlego; ke go thuša ka tšatši la phološo. Ke tlo go lotola ka go bea wa kgwerano le setšhaba, wa go tsoša naga ye, wa go tlo arolelwa magae maropeng. ₉O tle o botše bagolegwa wa re: Tšwang! Le ba ba lego leswiswing wa re: Tšwelelang! Ba tlo hwetša ditseleng go na le mafulo, phulo ya bona e le meboto e megolo. ₁₀Ba ka se hlwe ba ekwa tlala, ba ka se hlwe ba nyorwa; ba ka se ke ba hlohlwa ke ditimo le letšatši gobane Mogaugedi wa bona o tlo ba hlahla a ba iša didibeng tša meetse. ₁₁Dithaba tša ka tšohle ke tlo di dira tsela, mme mebila ya ka e tlo ba e megolo. ₁₂Bonang! Bao ba tšwa kgole! Bonang bala, ba tšwa leboa le bodikela; gomme ba bangwe ba tšwa nageng ya Sini. ₁₃Hee magodimo, hlalalang! Wena lefase, goloka! Lena dithaba hlalalang, gobane Morena o homotša tšhaba sa gagwe; bahlaki ba gagwe o a ba šokelwa.

₁₄Tsione yena o be a re: Morena o ntahlile, Mong wa ka o ntebetše.

₁₅Afa mosadi a ka lebala leseanyana lagwe, a lesa go šokelwa ngwana yo a mmelegego? -- Le ge yena a ka lebala, nna nka se go lebale. ₁₆Ruri leswao la gago ke le tloketše atleng tša ka; ke hlwa ke lebeletše merako ya gago ka mehla. ₁₇Bana ba gago ba tlo hlaganela ba tla; ge e le bathosanyi le bašwalalanyi ba tlo go tlogela. ₁₈Takataketša mahlo thoko tšohle, o bone; ba bokane bohle ba etla go wena. O realo Morena, o re: Ka bophelo bjaka, o tlo ba apara bohle bjalo ka botšhepi, o tlo itlhama ka bona bjalo ka motšewa ge a itlhama. ₁₉Gobane marope a gago, le marako a gago, le megola ya gago, di ka se lekane baagi, gobane ba ba bego ba go metša ba ile kgole. ₂₀Bana ba gago, ba o bego o hlakotšwe bona, o tlo ba kwa ka ditsebe tšago, ge ba re: Ke mpateletšana, ntšhutheleng sebaka, ke tle ke dule. ₂₁Ke mo pelong ya gago o tlogo re: Ke mang a ntswaletšego bona ba? Hleng ke be ke šetše ke hlakotšwe, ke sa hlwe ke belega, ke thopilwe, ke faletše? Ke mang a mphepetšego bona ba? Hleng ke be ke dutše ke ikgonere; ba be ba le kae bona ba?

₂₂Morena Mong wa bohle o re: Bonang! Bantle ke tlo ba emišetša atla sa ka, ka tsema foka sa ka gare ga ditšhaba. Ke mo ba tlogo tliša barwa ba gago ba ba kukile ka mabogo, barwedi ba gago ba ba belege ka magetla. ₂₃Dikgoši e tlo ba bafepi bago, mme mahumagadi e tlo ba baamuši bago; ba tlo go lotšha ba khuname fase, ba latswa lerole la nao tša gago. Ke mo o tlogo tseba ge Morena e le nna; gobane ba ba mpotilego ga ba šegamišwa. ₂₄Afa seoka se ka amogiwa dithebola? Mme mathopša a mofenyi a a phonyokga.

₂₅Go tlo ba bjalo. Morena o re: Seoka se tlo tšeelwa mathopša a sona, le segalabutšwa se tlo amogiwa dithebola; gobane ke tlo lwa le ba ba lwago nago; mme bana ba gago, ke nna ke tlogo ba phološa. ₂₆Ba ba go hlakišago ke tlo ba leša nama ya mebele ya bona, ba tlo buiwa ka madi a bona, eke ba nwile sebela. Ke mo nama ka moka e tlogo tseba ge Mophološi wa gago e le nna Morena, Molopolodi wago, Mogale wa Jakobo.