Baphološwa ba Morena ba tlo boela Tsione ka go hlalala
1Kwang se ke se bolelago, lena baphegelelatoko, le nyakago Morena. Lebelešang leswika leo le betlilwego ka lona, le moepo o išago wo le epilwego go wona. 2Lebelešang Aborahama tataweno, le Sara e a le belegego. Gobane mola ke mmitša o be a le noši, ka mo šegofatša, ka mo atiša. 3Gobane Morena o homotša Tsione; o homotša le marope a gona ka moka. Mašoka a gona o tlo a dira Edene, lehanata la gona o tlo le dira tšhemo ya Morena, mo go tlogo hwetšwa tlhalalo le lethabo, le tebogo le medumo ya diletšo. 4Phafogelang se ke se bolelago, lena ba setšhaba sa ka; lena batho ba ka, theetšang se ke se bolelago. Gobane molao o tlo tšwa go nna, moahlolelo wa ka ke akgofa ke o dira seetša sa ditšhaba. 5Toko ya ka e kgauswi; phološo ya ka e a tšwelela; mme matsogo a ka a tlo buša dilete. Dihlakehlake di nkholofetše, di hlologetšwe tsogo la ka. 6Llalang le bone legodimo, le bone lefase mo tlase ga lona; gobane legodimo le tlo tloga boka muši, lefase le tlo onala boka kobo, le ba ba agilego mo go lona ba tlo hwa ka mokgwa woo. Ge e le phološo ya ka e tlo ba ya neng le neng; mme toko ya ka e ka se senyege. 7Kwang se ke se bolelago, lena batsebatoko, lena batho ba melao ya ka e lego pelong tša bona! Le se ke la šia go nyatšwa ke batho; le se ke la tšhoga ge ba nyefola. 8Gobane ba tlo lewa ke tshwele boka kobo; dibokwana di tlo ba ja boka boya. Ge e le toko ya ka yona ke ya neng le neng, go phološa ga ka ga meloko le meloko ye e tlago. 9Tsoga! -- Tsoga! O apare maatla, Wena letsogo la Morena! Tsoga bjalo ka mehleng ya kgale, mehleng yela ya meloko ya bogologolo! Naa ga se wena o kgabutlilego mamokebe yola, o hlabakilego kwenakgolo! 10A ga se wena mopšhešawatle, meetse a bodiba bjo bogolo! Madiba a lewatle wa a dira tsela, baphološwa ba sela. 11Baphološwa ba Morena ba tlo boa ba tla Tsione ka go hlalala, ba tšhepile hlogo ka lethabo le le sa felego, ba fihletše thabo le tlhalalo, nyamo le phegelo di fulere.
12Ke nna ke le homotšago. O motho mang o boifa motho e a hwago, o boifa ngwanamotho mokamatlakala? 13O motho mang o lebala Morena e a go dirilego, moalalegodimo, mothealefase; wa hlwa o boifa ka mehla ge go befetšwe e a go bekago. Ge a itokišetša go go senya? E kae bjale pefelo ya e a go bekago? 14Mokudupani o tlo tloga a hunollwa; a ka se hwele moleteng; a ka se hloke le bogobe. 15Gobane Modimo wa gago ke nna Morena mmilošamawatle, maphoto a ona a a duma, Mong wa ina la Morena wa mašaba. 16Mantšu a ka ke a bea molomong wa gago; ke go khutiša moriting wa seatla sa ka, gore ke ale legodimo, ke thee lefase, ke botše Tsione ke re: O sethšaba sa ka! 17Hee Jerusalema, phafoga! Phafoga o eme! Wena yo Morena a go nošitšego senwelo sa kgalefo ya gagwe, wa nwa senwelo se se thekesedišago, wa hunyeletša le diphophi. 18O hlokile ketapele mo go bana bohle ba a ba tswetšego; mo go bana bao a ba fepilego o hlokile wa go mo swara ka seatla. 19Ke tšona tše pedi tše di go tletšego; o llelwa ke mang? Ke tšhwalalanyo le mašegerepe, le tlala le lerumo; o homotšwa ke mang? 20Banna ba gago ba remegile, ba rapaletše mebileng boka phoofolo e tantšwego; ba galetšwe ke kgalefo ya Morena, kgalemo ya Modimo wa gago. 21Bjale a nke o kwe ge, wena motlaišegi, e o buiwago ka tše e sego sebela. 22Morena Mong wa gago, Modimo wa gago, molwelasetšhaba sa gagwe, o re: Senwelo seo se se thekesedišago ke se tšea mo atleng tša gago, senwelo seo sa kgalefo ya ka, o ka se hlwe o se nwa. 23Ke tlo se neela diatleng tša ba go tlaišago, ba ba bego ba re: Inama, re go gate, re fete! Mokokotlo wago wa o dira mmu, ya ba tsela ya bafeti.
