JESAYA 9

₁Setšhaba se se sepelago leswiswing se bona seetša se segolo. Ba ba dutšego moriting wat lehu ba hlabelwa ke seetša. ₂Setšhaba o se atišitše; lethabo la sona o le godišitše; ba thaba pele ga gago bjalo ka ge go thabja punong, bjalo ka ge go hlalalwa ge go abaganywa dithebola. ₃Gobane o robile joko ye e bego e ba imela, le kgati e bego e tia magetla a bona, le lepara la bagapeletši ba bona; o di robile boka mohla wola wa Midiane. ₄Gobane dieta ka moka tša go rotoba tlhabanong, le diaparo tše di thankgetšego madi, e tlo ba tša go fišwa, di lewe ke mollo. ₅Gobane re tswaletšwe ngwana, re neilwe morwa, yo pušo e lego legetleng la gagwe. Leina la gagwe ke: Matete, Moeletši, Modimo yo maatla, Tate wa go sa felego, Kgoši ya kagišo. ₆Mmušo wo ke wa kenelo, wa khutšo ye e sa felego mo sedulong sa Dafida le mmušong wa gagwe, ke wa go tlo tia, le wa go thekgwa ka molao le ka toko bjale le mehleng ya neng le neng. Tšeo di tlo dirwa ke go pelofala ga Morena wa mašaba.

₇Mong a bohle o rometše lentšu go Jakobo, la fihlela Isiraele. ₈Le tlo tsebja ke setšhaba ka moka, Efuraimi le ba Samaria, ba go ikgodiša le go ipota pelong, ba re: ₉Go phušotšwe makokota, a re age ka matlapa! Go remilwe meumo, a re šeme merokwana!

₁₀Mme Morena a thekga manaba a Retsini, a go lwa le bona, a hlohleletša manaba a bona. ₁₁Basiria ba rotoga bohlabela; Bafilisita ba tsoga bodikela, ba ja Isiraele ka lejolebe. Le ka tše bjalo bogale bjagwe ga bo phohle; letsogo la gagwe le sa emišitšwe.

₁₂Mme setšhaba se ga se boele go eo a se otlilego, ga se nyake Morena wa mašaba. ₁₃Ka gona mo go Isiraele Morena o kgaola hlogo le mosela, lekala la molala le mohlahla ka tšatši le tee. ₁₄Hlogo o ra bagolo le dinopodi; mosela o ra baporofeta ba maaka. ₁₅Ketapele tša setšhaba di a se aroša; mme baarošwa ba bona ba yo senyega. ₁₆Molato ke woo Mong wa bohle a sa kgahlwe ke tshogana ya bona, a sa gaugele dišuana tša bona le bahlologadi; ka gobane bohle ke dihlola le ba babe; mme melomo yohle e bolela tša bošilo. Gomme ke ka tšona tše ka moka ge bogale bjagwe bo sa phohle, ge tsogo lagwe le sa emišitšwe.

₁₇Gobane bobe bja bona bo tšhuma boka mollo o fišago meetlwa le hlaga, wa fetša hlare tša lesodi, tša hlatloga e le mekubego ya meuši. ₁₈Naga e ba ya dipilo ka kgalefo ya Morena wa mašaba, setšhaba sa etša selewa sa mollo; motho a se hlwe a ekelela wabo. ₁₉O ngwatha ka go le letona, a kwa tlala e sal le gona; o ja ka go la ntsogošo, a se hore; motho a ba a ja nama ya letsogo lagwe. ₂₀Manase o ja Efuraimi, Efuraimi o ja Manase; mme ba babedi bao ba lakana Juda. Le ka tše bjalo bogale bjagwe ga bo phohle, letsogo la gagwe le sa emišitšwe.