Tiišetšo melekong
1Jakobo mohlanka wa Modimo le wa Morena Jesu Kriste o ngwalela ba meloko e lesome la metšo e mebedi, o re: Thabang!
2Bana bešo, ge le wela melekong ya mehutahuta, le re: ke lethabo fela. 3Le fele le tseba gore go lekwa ga tumelo go tšweletša kgotlelelo. 4Kgotlelelo yona a e be le modiro wo o tletšego, gore le be ba bolo ka tlalo ba ba se nago senyalo, le se be le mo le hlaetšago. 5Ge mo go lena go ka ba le e a hlaelwago ke bohlale, a a bo kgopele go Modimo, yena wa go nea bohle ka go rata, a sa nyatše motho. A a kgopele a fiwe. 6A a kgopele ka tumelo, a se dikadike; gobane e a dikadikago o swana le lephoto la lewatle, le le tsošwago ke phefo la akgaakgwa ke yona. 7Motho yo bjalo a se ke a re o tlo fiwa selo ke Morena; 8monna wa pelopedi, ditseleng tša gagwe ga a loke.
9Ngwana weno wa mmotlana a a kgantšhe bogolo. 10Wa mohumi a a kgantšhe bobotlana; gobane o tlo hlohlorega bjalo ka letšoba la bjanyeng. 11Gobane letšatši ge le hlaba le fiša, le tšhuma bjang, letšoba la bjona la hlohlorega, bothakga bja lona bja loba. Le mohumi o tlo pona ditseleng tša gagwe ka mokgwa woo.
12Wa lehlogonolo ke monna wa go kgotlelela melekong; gobane ge a bonwe go botega, o tlo fiwa mphapahlogo wa bophelo, wo Modimo a o holofeditšego ba ba mo ratago. 13Go se ke gwa ba le e a rego ge a lekwa, a re: ke lekwa ke Modimo; gobane Modimo ga a lekwe ke bobe; mme le yena ga a leke motho. 14Mang le mang e a lekwago, o gokwa a gogwa ke tumo ya gagwe. 15Mme tumo ge e amere, e tswala sebe; sebe sona ge se phethegile, se tswala lehu.
16Le se ke la forega, lena bana bešo ba ba rategago. 17Neo tšohle tše botse, le mpho tšohle di tletšego, di tšwa godimo go Radietša, yo go yena go sego phetogo le go dikologa ga meriti. 18Ke yena a ratilego go re tswala ka Lentšu la therešo, gore go be eke re dithakangwaga tša dibopiwa tša gagwe.
19Le tsebe, bana bešo, gore motho a a akgofiše go kwa, a diege go bolela, a diege go galefa. 20Gobane bogale bja motho ga bo diriše toko ya Modimo. 21Lahlang ge ditšhila ka moka le bobe bjo bo sa šaletšego; gomme lentšu le le hlomilwego mo go lena le le amogele ka boleta; ke lona le kgonago go phološa meoya ya lena.
22Bang badiri ba lentšu, e sego bakwi fela ba ba iphoraforetšago. 23Gobane ge motho e le mokwi wa lentšu mme a se be modiri wa lona, o swana le monna, e a rego ge a ipona seiponeng, a bona sefahlogo se a tswetšwego ka sona, 24a re ge a ipone a tloga, a lebala ka pela lebopo le a lego ka lona. 25Fela, e a bogelago ruri a bona se se lego molaong o tletšego wa khunologo mme a tiišetša moo, eo ga se mokwi e a gakwago, ke modiri wa modiro; ke yena a tlogo dira e le wa lehlogonolo.
26Ge motho a ka re: ke yo borapedi, mme a se sware leleme la gagwe ka mogala, a fora pelo ya gagwe, borapedi bja motho yo bjalo ke bja lefela. 27Borapedi bjo Modimo Tatawešo a bonago bo se na tšhila le senyalo, ke go hlola dišuana le bahlologadi mahlokong a bona, le go itota gore lefase le se go tšhilafatše.
