BAAHLODI 17

₁Dithabeng tša Efuraimi go kile gwa ba le monna e mongwe; leina la gagwe e be e le Mika. ₂Yena eo a bolela le mmagwe a re: Disilifera tšela tše sekete setee se se nago le lekgolo tše o di utsweditšwego, mme ka go kwa o rogana ka baka la tšona, tšhelete yeo e go nna; e tšerwe ke nna.

Mmagwe a re: Ngwanaka, a ke o šegofatšwe ke Morena. ₃Ya re ge a bušetša disilifera tšeo tše sekete se se nago le lekgolo, mmagwe a re: Ge e le nna disilifera tše ke di kgethetše Morena; ke di ntšha ka baka la ngwana wa ka, gore e be tša go dira seswantšho se se betlilwego, le se se bopilwego; a di nape di boele go wena. ₄Bjale ge Mika a tlišitše tšhelete yeo go mmagwe, mmagwe a tšea disilifera tše makgolo a mabedi a di nea morudi. Yena a mo direla seswantšho se se betlilwego, le se se bopilwego, sa tla sa ba mo ngwakong wa Mika.

₅Monna eo Mika a ba le ngwako wa Modimo; a dira le kobo ya moperisita, le ditaola, mme a bea e mongwe wa barwa ba gagwe a ba moperisita wa gagwe. ₆Mehleng yeo go be go se kgoši mo go Isiraele; e mongwe le e mongwe o be a dira ka mo a ratago ka gona.

₇Bjale go be go na le lesogana la Betlehema ga Juda, e a tšwilego go ba leloko la Juda, yena e le Molefi, a diiletše moo. ₈Monna e o be a tlogile motseng wa Betlehema wa ga Juda a yo nyaka madiilelo; a tla dithabeng tša Efuraimi, mme a feta ka lapeng la Mika. ₉Mika a mo rera a re: O tšwa kae?

Yena a re: Ke Molefi; ke tšwa Betlehema kua go la Juda; mme ke nyaka madiilelo.

₁₀Mika a re: Dula fa ga ka, o be tate le moperisita wa ka; ke tlo go nea disilifera tše lesome, le diaparo le dijo. Molefi eo a tsena. ₁₁A dumela go dula go monna eo; gomme lesogana leo la ba bjalo ka ngwana wa gagwe. ₁₂Mika a thwala Molefi eo a mo dira moperisita wa gagwe mme a dula lapeng la Mika. ₁₃Mika a re: Bjale ke tseba gore Morena o tlo ntšhegofatša, ka gobane ke na le moperisita wa Molefi.