Baisiraele ba tsoša moloko wa Benyamini
1Banna ba Isiraele mola Mitsipa ba be ba enne ba re: Mo go rena go ka se ke gwa ba le motho le o tee e a tlogo dumela ge morwedi wa gagwe a ka tšewa ke wa ga Benyamini. 2Mohla setšhaba se kgoboketšego Bethele, ba hlwile moo la ba la dikela ba le pele ga Morena, ba hlaboša mantšu ba lla sello se segolo. 3Ba re: Morena Modimo wa Isiraele, ke ka baka lang ge taba ye e diregetše Isiraele, ge lehono go hlokega leloko le lengwe la Isiraele?
4Ka la ka moswana setšhaba sa tsoga sa aga aletare gona moo, sa tliša dihlabelo le dibego. 5Baisiraele ba botšiša ba re: Mo go meloko ka moka ya Isiraele ke ofe moloko o sa kago wa tla phuthegong go Morena? Ka gobane go be go ennwe keno e kgolo ka baka la e a sa rotogego a tla go Morena Mitsipa, gwa thwe: o tlo bolawa. 6Bjale ba šegama ka baka la ba gabo ba Babenyamini, ba re: Lehono go ripilwe leloko letee la Isiraele. 7Re tlo dirang gore mašaledi ao a bone basadi, ka gobane re enne ra re: Re ka se ke ra dumela ge ba ka tšea barwedi ba rena.
8Gomme ba botšana ba re: A go na le leloko le lengwe le le sa kago la tla pele ga Morena re le kua Mitsipa? Gwa hwetšwa gore mohla wola wa pitšo mo mešašeng go be go se motho wa Jabese wa ga Gileada. 9Ka gobane batho ba be ba badilwe, gwa hlokwa ba Jabese wa ga Gileada. 10Bjale phuthego ya ntšha banna ba dikete tše lesome le metšo e mebedi, banna ba bagale, ya ba roma, ya ba laya ya re: Yang le bolaye ba motse wa Jabese wa ga Gileada ka bogale bja lerumo, le basadi le bana. 11Se le tlogo se dira sese: monna mang le mang le mosadi e a šetšego a tsebile monna, le ba dire segafiwamoka. 12Ba hwetša seleteng sa Jabese sa ga Gileada go na le basetsana ba makgolo a mane ba ba sešogo ba tseba monna. Ba tla nabo mo mešašeng motseng wa Silo nageng ya Kanana.
13Bjale phuthego ka moka ya roma batseta ba bolela le Babenyamini ba kua lentsweng la Rimoni, ba ba bitša ba re ke šebešebe. 14Mohla woo Babenyamini ba boa, ba newa basetsana bao ba bego ba šadišitšwe mola go bolawa ba motse wa Jabese wa ga Gilaeda; fela ba hlaela.
15Setšhaba sa fela se šegama ka baka la Babenyamini, ge Morena a fokotšitše meloko ya Isiraele ka mokgwa woo. 16Bagolo ba phuthego ba botšišana ba re: Ba ba hlaeletšwego re tlo ba dira bjang gore ba bone basadi; etšwe mo go Babenyamini basadi ba fedišitšwe? 17Ba re: Naga yona e tlo dula e le ya Babenyamini, ya bona bao ba ba šaletšego, gore mo go Isiraele go se ke gwa fedišwa leloko. 18Rena ga re kgone go ba tšeiša barwedi ba rena, ka ge Baisiraele ba enne ka la go re: E a neago Babenyamini mosadi, o tšwilwe.
19Ba re: Šedi. Ka ngwaga o mongwe le o mongwe go na le monyanya wa Morena motseng wa Silo ka thoko ya leboa bja Bethele, ka thoko ya bohlabela bja tsela e rotogago e etšwa Bethele e eya Sikeme, ka thoko ya borwa ya Lebona. 20Ba ruta Babenyamini maano ba re: Yang le ba lalele dirapeng tša merara. 21E re ge dikgarebe tša Silo di etšwa di bina, le šwahle le etšwa mo merareng le ba thope; e mongwe le e mongwe a ithopele mosadi mo go dikgarebe tša Silo, a mo iše mo nageng ya Benyamini. 22Ge botatabo goba ba gabobona ba ka tla go rena ba le bega, re tlo ba botša ra re: Ba gaugeleng ka baka la rena, gobane re šitilwe go ba thopela basadi ba ba ba hlakanyago; le gona ga le na molato, gobane ga la ka la ba nea.
23Babenyamini ba dira ka mokgwa woo; ba tšea basadi ka mo go lekanego palo ya bona; ba ba thopa mo go bao ba ba binago, ba boela magaeng a bona, ba aga metse ba dula go yona. 24Baisiraele le bona ba tloga gona moo ka lebaka leo, e mongwe le e mongwe a boela ga gabo go ba gabobona, e mongwe le e mongwe a leba gae ga gagwe.
25Mehleng yeo go be go se kgoši mo go Isiraele; e mongwe le e mongwe o be a dira ka mo a ratago.
