BAAHLODI 8

₁Banna ba Baefuraimi ba tla ba bolela le Gideoni ba re: O reng o re dira ka mokgwa wo, o sa re bitše mola o tšwela go hlabana le Bamidiani? Ba mo omanya ka kudu.

₂Yena a fetola a re: Nna ke dirileng se se kago etša tše lena le di dirilego? Hleng dipudutša tša Efuraimi di fetiša puno yohle ya merara ya ga Abiesere! ₃Dikgoši tša Bamidiani, Orebe le Seebe, Morena o di gafetše diatleng tša lena. Nna ke kgonneng se se kago lekana le seo le se dirilego? Ge a bolela mantšu a mabjalo le bona, pefelo ya bona ya kokobela.

₄Mola Gideoni a setše noka ya Jorodane a na le banna bala ba makgolo a mararo, ba be ba lapile ka go raka manaba. ₅Gideoni a kgopela banna ba Sukothe a re: Batho ba ba ba nago le nna, a nke le ba neeng mefagonyana, ka gobane ba lapile; gomme re sa hlomarela Seba le Tsalamuna dikgoši tša Midiani.

₆Ba bagolo ba Sukothe ba re: Afa o šetše o swere matsogo a Seba le Tsalamuna ka diatla tša gago, ge o re re nee dira tša gago magobe?

₇Gideoni a re: Ruri, mohla, Morena a gafelago Seba le Tsalamuna diatleng tša ka, ke tlo tlapiriganya mebele ya lena ka meetlwa ya naga le ka mengana. ₈A tloga moo a rotogela Penuele; le ba ntshe a ba kgopela ka mokgwa woo; mme batho ba Penuele ba mo fetola ka mokgwa woo wa ba Sukothe. ₉Banna ba Penuele Gideoni a ba rera a re: Mohla ke boago ntwa e fedile, ke tlo phušola sebo se.

₁₀Seba le Tsalamuna ke ge ba le Karakoro, ba na le madira a bona, e le banna ba e ka bago dikete tše lesome le metšo e mehlano, e le ba ba šaletšego ba madira a Matšwabohlabela. Ba ba bego ba bolailwe e be e le ba dikete tše lekgolo le le nago le masome a mabedi a dikete, ge go balwa ba ba bego ba swere marumo. ₁₁Gideoni a rotoga ka tsela ya ba mehlape, a rarela Noba le Jokobea ka thoko ya bohlabela, a fenya dira tšeo, ka gobane o ba hweditše ba iketlile. ₁₂Seba le Tsalamuna ba tšhaba, a ba šala morago, a swara dikgoši tšeo tše pedi tša Bamidiani, Seba le Tsalamuna, a šwalalanya madira a bona.

₁₃Gideoni morwa wa Joase ge a boa mo ntweng a fologa ka sefata sa Herese, ₁₄A swara lesogana la ba Sukothe a le botšiša; lona la mo ngwalela maina ka moka a bakgoma ba Sukothe le a ba bagolo ba gona, maina a banna ba masome a šupago le metšo e šupago. ₁₅Ge a tla go banna ba Sukothe, a re: Seba le Tsalamuna šeba! Ke bao le nkwerilego ka baka la bona la re: Afa matsogo a Seba le a Tsalamuna a o šetše o a swere ge o re re nee batho ba ba gago ba ba lapilego magobe? ₁₆A napa a swara ba bagolo bao ba motse, a tšea meetlwa ya naga a ba tlapiriganya, ya ba go lemolla batho ba Sukothe. ₁₇Sebo sa Penuele a se phušola, a bolaya batho ba motse.

₁₈Bjale Gideoni a bolela le Seba le Tsalamuna a re: Banna bala ba le ba bolailego kua Thabora e be e le ba babjang?

Bona ba re: Ba be ba etša wena, e le dinatla wa bana ba kgoši.

₁₉Gideoni a re: Bona bala e be e le bana bešo, bana ba mme. Ka bophelo bja Morena ge le ka be le ba leseditše ba phela, nka be ke sa le bolaye. ₂₀A botša Jethere morwa wa gagwe wa ntlha a re: Tsoga, o ba bolaye. Lesogana leo la se ke la khwamola tšhoša, le boifa ka ge e sa le lesoganyana.

₂₁Seba le Tsalamuna ba re: A go tsoge wena o re bolaye, ka gobane monna o ka maatla a gagwe. Gideoni a tsoga a bolaya Seba le Tsalamuna; a tšea maseka a mo melaleng ya dikamela tša bona.

₂₂Banna ba Isiraele ba tla ba bolela le Gideoni ba re: Baa kgoši ya rena, wena le morwa wa gago, le morwa wa morwa wa gago; ka gobane o re namoletše diatleng tša Bamidiani.

₂₃Gideoni a re: Nna nka se be kgoši ya lena; le morwa wa ka a ka se be kgoši ya lena. Kgoši ya lena ke Morena. ₂₄Gideoni a ba rera a re: Ke na le se ke se kgopelago go lena: E mongwe le e mongwe a a nnee lengina le a le thopilego. Bamidiani ba be ba apara mangina a gauta ka gobane e be e le Baisimaele.

₂₅Ba re: Ona re tla go nea. Ba ala kobo; ka moka ba lahlela mangina a ba a thopilego. ₂₆Gomme theko ya mangina ao a gauta a a a kgopetšego ya ba sekele tše sekete le makgolo a šupago tša gauta, go sa balwe maseka, le difaga, le diaparo tša purapura tše di bego di aparwa ke magoši a Bamidiani, go sa balwe le dingangane tša melala ya dikamela. ₂₇Ka tšona Gideoni a dira kobo ya moperisita, a thoma modiro woo motseng wa Ofura; gomme Baisiraele ka moka ba timela ka go latela ba etla moo; ya ba moreo o tantšego Gideoni le ba leloko la gagwe.

₂₈Bamidiani bona ba loba Baisiraele, ba se sa tsoša melala; gwa fela nywaga e masome a mane go iketlilwe nageng mehleng Gideoni a sa phela.

₂₉Yena Jerubaali morwa wa Joase a ya a itulela motseng wa gagwe. ₃₀Gideoni o be a na le barwa ba masome a šupago ba ba tswetšwego ke yena, gobane o be a na le basadi ba bantši. ₃₁Mosadi e monyenyane wa gagwe, e a bego a dutše motseng wa Sikeme, le yena a mmelegela morwa, a mo rea leina la Abimeleke. ₃₂Gideoni morwa wa Joase o hwile a tšofetše o botse, a bolokwa lebitleng la Joase tatagwe motseng wa Ofura wa ga Abiesere.

₃₃Mehleng ya ge Gideoni a šetše a hwile, Baisiraele ba boela ba fapogela go tša Baali, ba ipeela “Baali wa Kgwerano” ya ba modimo wa bona. ₃₄Ke ka gobane ba be ba lebetše Morena Modimo wa bona, e a ba namoletšego diatleng tša manaba a bona a bego a ba dikologile. ₃₅Le ba leloko la Jerubaali Gideoni ga ba a ka ba ba dira gabotse, ba lebetše tše di botse tše a di diretšego Isiraele.