JEREMIA 21

₁Šele lentšu le le tletšego Jeremia le etšwa go Morena mohla wola kgoši Tsedekia a romile Pashuri morwa wa Malakia, le Tsefanya morwa wa Maaseya moperisita, ba tla go Jeremia ba re: ₂A ko re botšišetše Morena, ka gobane Nebukadinetsara kgoši ya Babele o lwa le rena. Mohlomongwe Morena a ka re thuša ka mokgwa wa mehlolo ya gagwe ka moka, lenaba la re gomela.

₃Jeremia a fetola a re: Botšang Tsedekia le re: ₄Morena Modimo wa Isiraele o re: Tsebang gore marumo ao le a swerego ka diatla tša lena, e le a go hlabana le kgoši ya Babele le Bakaladea ba ba le rakelelago kua ntle ga merako, ke tlo a phekgola a boa, a tla a tlala motseng wono. ₅Ke nna ka nnoši ke tlogo emiša seatla, ka akga letsogo ka lwa le lena ke befetšwe, ke galefile, ke le wa sehlogo se segolo. ₆Baagi ba motse wo ke tlo ba otla; go tlo hwa batho le dikgomo ka dinkhu tše kgolo. ₇Ge go šetše go le bjalo, ke mo yena Tsedekia kgoši ya Juda, le bahlanka ba gagwe, le setšhaba se se tlogo ba se šadišitšwe ke dinkhu le lerumo, ke tlogo ba gafela diatleng tša Nebukadinetsara kgoši ya Babele, le diatleng tša ba ba ratago go ba bolaya; o tlo ba bolaya ka bogale bja lerumo; a ka se setše motho, a ka se hlaole; a ka se gaogele motho. O realo Morena.

₈Ge e le ba setšhaba o ba botše o re: Morena o re: Hlaolang, ditsela šedi, ya bophelo le ya lehu! ₉E a šalago motseng wo o tlo hwa ka lerumo le ka tlala le ka dinkhu; ge e le e a tšwago a ineela Bakaladea ba ba le rakelelago, o tlo phela, a tloga a ithopetše bophelo bja gagwe. ₁₀Gobane motse wo ke o lebeletše gore ke o tlišetše bošula; ga ke o tlišetše tše botse. O realo Morena. O tlo gafelwa diatleng tša kgoši ya Babele; mme yena o tlo o tšhuma ka mollo.

₁₁Ba motse wa mošate wa Juda, kwang lentšu la Morena! ₁₂Lena ba moloko wa Dafida, Morena o re: Ahlolang e sa le ka moswana, le ye ka molao; mohlaki le mo namolele ge a pateletšwa, kgalefo ya ka e se tlo tla boka mollo, ya tlo tuka e sa time, e le go lefetša bobe bja mediro ya lena. ₁₃Tseba gore ke lwa nago wene modulamoeding, lentswemolaleng! O realo Morena. O ra bolena le rego: Ke mang a kago theogela go rena? Digoleng tša rena go ka tsena mang? ₁₄Le tlo tlelwa ke nna ka molato wa dikenyo tša mediro ya lena. O realo Morena. Mo sekgweng sa lena ke tlo tšhuma mollo wo o tlogo fiša tšohle tše di lego hleng ga sona.