JEREMIA 24

₁Morena o kile a re: Bona! Ka bona diroto tše pedi tša mago, di beilwe pele ga Ngwako wa Morena. Ke mola Nebukadinetsara kgoši ya Babele a thopile Jekonja morwa wa Joyakima kgoši ya Juda, le bakgoma ba Juda, le babetli le barudi, a tšwa nabo mo Jerusalema a ba iša Babele. ₂Se sengwe sa diroto tšeo se be se na le mago a botsebotse, mago a marakangwaga. Ge e le mago a seroto sela se sengwe e be e se ka go befa, e le a sa jegego ka go befa. ₃Morena a bolela le nna a re: Jeremia, o bonang? -- Ka re ke bona mago; a a lego botse, ke a botsebotse; a a befilego, ona ga se ka go befa, ga a jege ka go befa.

₄Ke mo Lentšu la Morena le ntletšego la re: ₅Morena Modimo wa Isiraele o re: Go tlo ya ka mokgwa woo ge mathopša ao a Juda, ke a tlošitšego felo fa ka a iša nageng ya Kaladea, ge ke ba bona e le mago a botse, mme ka ba setša. ₆Ke tlo dula ke ba lebeletše ka botho; ka tlo ba ka ba bušetša nageng ye; ka ba agiša, ke se hlwe ke šwalalanya; ka ba hloma, ke se hlwe ke tomola. ₇Ke tlo ba nea pelo ya go ntseba, ge Morena e le nna. Bona e tlo ba setšhaba sa ka, nna ka ba Modimo wa bona; gobane ba tlo ba ba boetše go nna ka pelo ka moka.

₈Go tlo ya ka mokgwa woo, ge ke tlo ba bona e le mago a befilego, a a sa jegego ka go befa. O realo Morena. Ke tše ke tlogo di dira Tsedekia kgoši ya Juda, le bakgoma ba gagwe, le mašalela a Jerusalema a a šalago nageng ye, le a a dutšego nageng ya Egipita. ₉Ke tlo ba dira ka mokgwa wo mabošula a bona a tlogo tšhoša mebušo ka moka ya lefase. Mo gohle mo ke tlogo ba lelekela gona ke tlo ba dira ba go nyatšwa le go rogwa le go kwerwa, le ba leina la bona e tlogo ba leroga. ₁₀Bona bao ke tlo ba romela lerumo, le tlala, le dinkhu, ba tlo ba ba fela mo nageng ye ke e neilego bona le botatabo.