JEREMIA 40

₁Šele lentšu le le tletšego Jeremia le etšwa go Morena; ke la mola Nebusaradani letona la madira a mošate a šetše a mo hunolotše a le Rama, a mo ntšha a tlemilwe ka diketane, a na le ba ba thopilwego bohle ba Jerusalema le ba Juda, ba ba bego ba išwa Babele.

₂Letona la dikala la ntšha Jeremia la re: Morena Modimo wa gago ke yena a boletšego bošula bjo bo wetšego motse wo. ₃Bjale o tlišitše tše a di boletšego, o di phethile. Ke ka gobane le mo sentše, le sa ka la kwa lentšu la gagwe; ya ba gona le tlelwago ke tše a di boletšego. ₄Bjale wena tseba gore lehono ke go hunolotše; ke tloša ditshipi tše o tlemilwego ka tšona. Ge o ka rata go ya Babele le nna, gona o ka tla; mme o tlo lotolwa ke nna. Fela, ge o sa rate go ya Babele le nna, o ka no lesa; naga še, e ahlame pele ga gago. O ka ya mo o ratago, mo go go kgahlago.

₅Ya re Jeremia a sešo a fetola, letona la re: O ka boela go Gedalia morwa wa Ahikama morwa wa Safane, yo kgoši ya Babele a mmeilego go buša metse ya Juda; o dule go yena o na le batho ba bangwe, goba o ye mo o hwetšago go go kgahla. Gomme letona la madira a mošate la mo fa mefago le dineo, la mo lesa a sepela. ₆Jeremia a ya go Gedalia morwa wa Ahikama motseng wa Mitsipa, a dula go yena a na le batho ba bangwe ba ba bego ba šetše nageng yeo.

₇Balaodi ba dira bohle, ba ba bego ba le nageng yeo, le banna ba bona, ge ba ekwa gore kgoši ya Babele o beile Gedalia morwa wa Ahikama gore a buše naga yeo, a mo laeletše le banna le basadi le bana ba banyenyane, le batho ba babotlana nageng yeo, ba ba sa kago ba išwa Babele, ₈Ba tla go Gedalia motseng wa Mitsipa. E be e le Esimaele morwa wa Nethanya, le Johanane le Jonathane barwa ba Karea, le Seraya morwa wa Thanumethe le barwa ba Efai wa Netofa, le Jesanya morwa wa Maaka; bona ba ba tla le batho ba bona. ₉Gedalia morwa wa Ahikama morwa wa Safane, a ba enela le batho ba bona, a re: Le se ke la boifa go ba balata ba Bakaladea. Dulang nageng yeno, le hlankele kgoši ya Babele; gona le tlo phela gabotse. ₁₀Ge e le nna le tsebe gore ke dutše fa Mitsipa, gore ke kgone go bolela le Bakaladea ba ba tlago go rena. Ge e le lena, fulang merara le dienywa le dihlware tša makhura, le tlatše dinkgo tša lena, le dule metseng ye le tsenego mo go yona. ₁₁Gwa tla le Bajuda ka moka ba ba bego ba le ga Moaba le go Baamoni le Edomo, le dinageng tšeo ka moka; ba tla ge ba ekwa gore kgoši ya Babele e tlogetše mašalela kua Juda, le gore o beile Gedalia morwa wa Ahikama morwa wa Safane gore a ba buše. ₁₂Bajuda ka moka ba tla ba etšwa metseng ka moka ye ba bego ba tšhabetše go yona; ba tla nageng ya Juda go Gedalia motseng wa Mitsipa, ba fula merara le dienywa, e le tše ntši.

₁₃Le Johanane morwa wa Karea, le ditona ka moka tša dira tše di bego di le nageng, ba tla go Gedalia, ₁₄Ba re: Afa o a tseba gobane Baalise kgoši ya Baamoni o romile Isimaele morwa wa Nethanya, a re a go bolaye? Gedalia morwa wa Ahikama a se ba dumele. ₁₅Johanane morwa wa Karea a tla a bolela le Gedalia thopeng ba le moo Mitsipa, a re: Ntumelele ke ye ke bolaye Isimaele morwa wa Nethanya ga go motho ea tlogo di tseba. O reng o fo lesa a go bolaya, mme Bajuda ka moka ba ba phuthegetšego go wene ba gašanywa, gwa lahlega ona mašalela a Juda?

₁₆Gedalia morwa wa Ahikama a laela Johanane morwa wa Karea a re: O se ke wa dira dilo tšeo; gobane tše o bolelago Isimaele ka tšona ke maaka.