Setšhaba se se arogilego se tlo tlelwa ke manaba
1Tšhabang, lena ba ga Benyamini, le tšwe mo go ba Jerusalema, le yo letša phalafala kua Thekoa, kua Bethe-Kerema le yo gotša mollo wa mabothelele; gobane thoko ya leboa re okamelwa ke bošula, mašegerepe a magolo. 2Ngwanenyana wa Tsione, yena yo tsoro wa seithati, ke a mo fediša. 3O tlelwa ke badiši ka mehlape ya bona; ba hloma mešaša ba mo tiela gare; e mongwe le e mongwe o fudišetša hlakoreng la gagwe. 4Go thwe: Laolang, re o tšwele dira! Tsogang, re totoge e sal le mosegare. -- Joo, re a hulwa! Le šetše le rapama; meriti e a gonoga. -- 5Go thwe: Tsogang, re rotoge bošego, re thube motse woo wa mošate.
6Gobane go boletše Morena wa mašaba a re: Remang dihlare, le rakelele motse wa Jerusalema ka legora. Ke wona motse wa go thwe o otliwe; tše di lego mo go wona ke tša šiši fela. 7Bobe bja wona bo seloga boka meetse a mothopo; tša gona ke go sebelwa bolotšana le sehlogo. Se nna ke hlwago ke se bona ke dintho le megogoma. 8Eletšega, motse wa Jerusalema, gore pelo ya ka e se kgaogane nago, ke se tlogo lesa wa ba lehanata, naga ye e sa dulego motho.
9Morena wa mašaba o re: Isiraele o tlo ka morara o kgobišitšwego, moišwaseatla wa fulwa le dipudutša.
10Ke sa tlo bolela le mang, ka mo anegela taba a kwa? Hleng ditsebe tša bona di ne bošoboro; ga di kgone go theetša. Hleng lentšu la Morena le ba gobogetše, ga ba sa le thabela. Mme nna ke tletše kgalefo ya Morena, ke šitwa go itshwara.
11A e tšhologe gee, godimo ga bana mekgolokgotheng, le godimo ga diboka tša masogana, ge ba le mmogo; ka gobane a tlo patlaganya banna le basadi, le bagolo le bakgalabje. 12Mme nywako ya bona e tlo ba ya batho ba mathoko, gotee le mašemo le basadi; gobane tsogo la ka ke le akalatša godimo ga baagi ba lefase leno. O realo Morena. 13Ke ka gobane ka moka ga bona, ba banyenyane le ba bagolo, ke ba mapelompeta; le baporofeta le baperisita ka moka ba a fora. 14Thobego ya setšhaba sa ka ba e alafa ba sa e re selo; ba re: Khutšo! Khutšo! Mola go se khutšo. 15Ba tlo lewa ke dihlong, gobane ba dirile tše makgapha, ba se ne dihlong, ba sa šetše tše di nyatšišago. Bjale ba tlo wa le ba ba wago. Ba tlo kgopša mohla ke tlago go ba hlola. O realo Morena.
16Morena o boletše a re: Emang ditseleng le lebelele, le botšiše ditsela tša bogologolo; le bone ye e lego tsela e botse, le kgone go tšea ka yona. Ke mo le tlogo hwetša bokhutšo bja meoya ya lena!
Mme bona ba re: Ga re ye! 17Ka le beela bahlapetši, ka re le kwe ge go lla phalafala! -- Mme bona ba re: Re ka se theeletše!
18Ke gona kwang, lena bantle, le wene phuthego o tsebe se ba tlogo se dirwa. 19Wene lefase, theetša, o tsebe gore tšhaba se ke se tlišetša mabošula a ba itlholetšego ona ka dikelelo tša bona. Gobane ba ganne go theetša se ke se boletšego; mme molao wa ka ba o lahla. 20Diorelo tše di tšwago Seba, le mere e tšwago dinageng tša kgole, ke dirang ka tšona? Didimo tša lena ga di nkgahle, le dibego tša lena ga di nnatefele. 21Molato ke wona woo ge Morena a re: Tšhaba se ke se beela dikgopišo, go kgopše botatago bana ga mmogo le bana ba bona, go senyege motho le moagišani wagwe.
22Morena o re: Seseowe setšhaba! Se tla se etšwa nageng ya kua leboa; mme morafo o montši o rotoga kua magomong a lefase. 23Ba tla ba swere bora le tšhoša; ke dikgalabutšwa tše di sa tsebego kgaogelo; legoa la bona le duma wa lewatle; ba nametše dipitsi; ba itlhama boka mohlabani o tee. Ba tla go lwa nago, ngwanana wa Tsione.
24Re ba kwele ge ba sebja, ra repha matsogo, ra welwa ke tlalelo, ra šokwa wa mmelegi. 25O se ke wa ya mašemong; le se ke la wela tsela; go lerumo la lenaba, go dikologa tše di šiišago.
26Hee ngwanenyana wa setšhaba sa gešo, apara mankgeretla, ripitla moloreng o lle wa mohla go llelwa ngwana e a lego nnoši. Lla gabohloko, gobane Maphušole o re tlela wa sehlogo. 27Ke go beile moubedi mo go setšhaba sa ka, maitše wa ditshipi, gore o tsebe o hlathe ditsela tša bona. 28Ke dinganganganga, ba šataka ka mereba, ke mphiri, ke tshipi, ke bašwalalanyi ka moka ga bona. 29Mouba o ubetše; morodu o senyegetše leubeng. Go hlwa o ubela ke lefela; manyedi a ganetše. 30Ba tlo re ke tshipitshehla ya go lahlwa, ge Morena a ba lahla.
