JOBO 10

₁Pelo ya ka e tennwe ke bophelo bja ka; ke tlo ikgafela sello sa ka; ke tlo bola se se mpabišago pelo. ₂Ke tlo bolela le Modimo ka re: Se ntahle; hle ntsebiše se se go lwešago le nna. ₃A o ka natefelwa ke go tsoša maatla, wa lahla yo o mmopilego ka diatla? A o ka kgahlwa ke morero wa ba babe? ₄Mahlo a gago a ke a nama? A o bona boka motho ge a bona? ₅A matšatši a gago a etša matšatši a motho? Le nywaga ya gago a e ka balwa ka matšatši a monna? ₆O reng ge o tsoma molato go nna; o reng o latiša dibe tša ka? ₇Etšwe o tseba ge ke se yo mobe, le gore ge o ntshwara nka hloka monamodi. ₈Diatla tša gago di mpopile, di ntirile; mme bjalo o phekgogela go mmetša. ₉A nke o se lebale ge o mpopile bjalo ka letsopa; bjale o nkgomišetša leroleng. ₁₀A ga wa ka wa ntšholla bjalo ka maswi, wa nthemiša boka maswi ge a kgahla? ₁₁Wa nkapeša ka letlalo le ka nama, wa ntoga ka mašapo le mešifa. ₁₂Bophelo le botho ke di diretšwe ke wena, wa hlokomela moya wa ka ka go mpabalela. ₁₃Anthe tše o bego o di uta ka pelong, tše ke tsebago gore o be o di eleletša, šedi: ₁₄O be o re: Ge nka senya o tlo nkela hloko, wa se nape wa nkhunolla molatong. ₁₅Ka šaetša, ke tlo ba yo madimabe; ka loka, le gona ke se tsoše hlogo ka go lewa ke dihlong le go bona tšhego. ₁₆Gomme ge nka tsoša hlogo, o tlo ntsoma boka tau, wa buša wa ntira ka mokgwa o makatšago. ₁₇O tlo fela o ntebanya le dihlatse tšago, wa koketletša tša go nkgalefela, wa nkepela dira tša mahloko. ₁₈Bjale ke ka baka lang ge o ntšweleditše ka belegwa? A mola nkabe ke felele ke sešo ka bonwa ke leihlo! ₁₉Nkabe ke be mosebegona; nkabe ke išwe lebitleng ke sa tšwa go belegwa. ₂₀Hleng matšatši a ka ga a nenyana! A a ntese hle ke phuthologe ka go nyane, ₂₁ke tsebo tloga, ke se hlwe ke boa kua go lego naga ya leswiswi, thiti ya lehu, ₂₂naga swii ya leswiswiswiswi, ya thiti ya lehu le ya kgobelano, moo kgampi e thwego seetša.