JOBO 20

₁Gwa fetola Tsofara wa Naama, a re: ₂Ke ka baka leo ke fetola ke boledišwa ke kelelo tša ka; ke tšona di ntutuetšago. ₃Tsholo ye e nkgobošago ke e kwile; pelo yona e mphetola ka tše ke di tsebago. ₄A ga o tsebe tša bogologolo, tša mola motho a beilwe lefaseng? ₅Tša gore go hlalala ga ba babe ga go iše kgole, le gore lethabo la bahlanogi ke la lebakanyana fela. ₆Le ge borena bjagwe bo ka akalala bja fihla godimong, le ge hlogo yagwe e ka goma kua marung, ₇o tlo ba a senyega le ditšhila tšagwe ya ba moka, ba ba bego ba mmona ba re: Naa o ile kae? ₈O tlo ba a širogile a bjalo ka diloro, a se hlwe a bonwa, a go timeletše boka pono ya bošego. ₉Leihlo le bego le mmona, le ka se hlwe le mmona; le motse wa gagwe ga o sa mmona. ₁₀Bana bagwe ba tlo šika le bahumanegi; mme atla tšagwe di tlo ntšha se a se ruilego. ₁₁Mašapo a gagwe le ge a tletše maatlabosogana, a tla yo lala leroleng le yena. ₁₂Bobe le ge bo mo tsefetše leganong, a bo uta ka tlase ga leleme lagwe, ₁₃a bo hupa a sa bo tshwe, a bo loketše dithameng, ₁₄bogobe bja gagwe bo le mo maleng bo tlo fetoga. Bo tlo mo fetogela hloko bja marabe bo le teng ga gagwe. ₁₅O tlo hlatša thoto a e meditšego; Modimo o tlo e gamola mo mpeng ya gagwe. ₁₆O nwile hloko bja marabe, o tlo hwa ka leme la petla. ₁₇Ga a sa tlo kgahlwa ke dinokana; ga a sa tlo thabela go ela ga mafula a dinose le a maswi. ₁₈Tše a di gogotšego, o tlo buša a di ntšha, a sešo a di metša; le tše a di rekilego a ka se di thabele. ₁₉Ke ka gobane a katile basenyegi a ba lahla; o amogile nywako, a se ke a aga. ₂₀Dimpa tša gagwe di be di sa hore; a ka se sa phonyokga a na le tše a bego a di rata. ₂₁Mola a eja, o be a sa šadiše; maruo a gagwe ge a sa tie, ke ka baka leo. ₂₂Le ge a patlwa ke menono, o a šia, o tlo tlelwa ke matsogo ohle a bahlaki. ₂₃E tlo re a sa tlatša dimpa tšagwe, ya ba gona Modimo a romago phišo ya bogale bjagwe, tša mo wela a sa le dijong. ₂₄A sa tšhaba dibetša tša tshipi, o tla yo betšwa ka bora bja mphiri. ₂₅Ge a hlomola mosebe o boa o phadima sabohloko; ya ba gona a welwago ke go tšhoga. ₂₆Mabošula ohle a beetšwe matlotlo a gagwe; o lewa ke mollo o sa butšwelwego; gwa senyega se se šaletšego mo ngwakong wa gagwe. ₂₇Magodimo a tlo utolla molato wa gagwe; mme lefase le tlo tsoga la lwa nae. ₂₈Mahumo a ngwakong wa gagwe a tlo thopša; a tlo kgolwa mohla wa bogale bja Modimo. ₂₉Ke yona kabelo ya motho e mobe ye e tlogo tšwa go Modimo; ke lona lefa le a le beetšwego ke Modimo.