JOBO 23

₁Jobo a fetola a re: ₂Le lehono ke sa lla di mpefetše; seatla sa gagwe se nthoba ge ke fegelwa. ₃A mola nkabe ke tseba mo nkago mo hwetša, ka fihla mo go sedulo sa gagwe. ₄Ke mo nka bego ke mo anegela taba, molomo wa ka nka be ke o tlatša maiphetolelo. ₅Ke mo nka bego ke ekwa ge a mphetola; ka hlaologanya tše a tlogo mpotša tšona. ₆A a ka ntshekiša ka maatlamagolo a gagwe? Aowaa, a ka be a ntšhetša. ₇Gona o tlo fetolana le moloki, ka lokologa go ya go ile go Moahlodi wa ka. ₈Fela, ke leba bohlabela; gomme ga a gona. Ke leba bohlabela; gomme ga a gona. Ke leba bodikela; ka hloka le go mo kwa. ₉A ka ba modirong kua thoko ya leboa; ga ke mmone. Goba o fapogetše borwa? Nna ga ke mo hwetše. ₁₀Hleng tsela ye ke lego mo go yona o a e tseba; ge a ka nteka nkabe ke tlo tšwa boka gauta. ₁₁Maoto a ka a gomaretše nao tšagwe; ke swere ka tsela ya gagwe ke sa e fapoge. ₁₂Ga nka ka tlogela taelo tša molomo wagwe; polelo tša molomo wagwe ke di bolokile, ka lesa mokgwa wa ka. ₁₃Gomme yena ga a thiše. O bušwa ke mang? O dira se pelo ya gagwe e se ratago. ₁₄O tlo phetha se ke se beetšwego; gomme tše bjalo mo go yena ke tše ntši. ₁₅Ke tšona, ge ke tšhoga sefahlogo sagwe; ge ke eleletša, ke kwa ke boifa. ₁₆Modimo o tšhošitše pelo ya ka; Yomaatlaohle o nkgakantšhitše. ₁₇Gobane ga ke pateletšwe ke leswiswi le; ke tše di lego pele ga ka ge di utilwe bosong.